في الحقيقه
السلطانيه او التاج التانى
كان اتبعتلى اول مره من روزاليا
واتبعتلى تانى فـ طبعا ح اكتب 5 حجات بس فيه
مش كوسه هي
اخدت وقت كتييييييير افكر هى ايه الحجات الى محدش يعرفها عنى
وقررت اكتب الي يجى على بالي
------------------
في حاجه غريبه عندى من زماان اوى
انى نفسي جداا لما اركب مركب واسافر بيها
اكتب شفره سريه و اطبقها واحطها في ازازه واقفلها بالبتاعه دى
الي شبه الفلين
زي الى بتيجى في الكرتون
واتخيل انه حد حيكتشفها بعد ما انا اموت بميييييييييت سنه ويبحث ويدور ورايا
وكده بقا ... بس الغريب انى لسه معرفتش حكتب فيها ايه
الي له علاقه بنفس الموضوع .. انه من ظاهره الاحتباس الحراري متوقع ان جزيرتى بورفؤاد
تغرق
بفرح جدااا لما اعرف انه سريري و حجاتى وكده ...حيبقوا اثار والناس تيجى تتفرج عليهم
من كتر التخيل
انا بجد وكأنى شوفت الناس دي
وهما بقا عمالين يقولوا يااااااااااااه و حواجبهم مرفوعه ومركزين جداا
عادى يعنى
-------------------------
في المواقف الي بتحصلي في يومى العادى
سعات بستخدم تقنيه التصوير ثلاثي الابعاد الي زي بتاع فيلم ماتريكس
ده .... يعنى في مواقف او ناس بعملهم
pause
والف حوليهم في خيالى بنفس الشكل ده
وتطلع حجات من الازرق والاخضر بتاعت افلام الهاكرز
والكمبيوتر وعالم الديجيتال
الي شاف فيلم ماتريكس حيفهم ازاى بشوفهم
----------------------------
امممممممممممممممممم
حاجه عن الطفوله
-كل الاطفال الي ربنا خلقهم لما كانوا بيتأملوا الدنيا
كانوا بيبصوا على العصافير ... ويسألوا سؤال ... ماما ماما هو احنا ليه مش بنطير
او ليه العصفور بيطير
انا بقا عمرى ما جه في بالي السؤال ده
الي جه في بالى هو
ليه العصفور بيعرف يقف على الحيطه
او الحجات الرأسيه يعنى
وكان نفسي جداا امشي على الحيطه
على الله حد يقولى في حجات تانيه بتقف على الحيطه ... ماشي
!!
بجد معرفش ليه الحكايه دي كانت شاغله بالي جداا
------------------------------
في حاجه عن النمل بما ان كـل الناس ليها حكايات مع النمل
انا وانا صغيره كان بيصعب عليا النمل جدااا
لانه صغير وخطوته صغيره
بالمقارنه بحجمى
غير انى لغايه دلوقتى بستمتع جداا وانا بلعب معاه
انما كنت بعمل حاجه وبطلتها
وهى انى كنت تاااكسي للنمل
يعنى لما اشوف نامله ماشيه ... احطلها ايدى لغايه لما تطلع عليها .. واوصلها الجحر بتاعها و انزلها
وكمان كان عندى تصور كامل لجحر النمل ... وكنت بتخيله لما نمله تموت والاسعاف يجى بقا
وعندهم جوه سراير صغننه
يعنى زي الجحر بتاع الفار جيري كده
في كل حاجه على صغنن
-----------------------------------
فاضل حكايه واحده
اممممممممممم اقولكم ايييييه
اه
يا جماعه انا بستنى الكائنات الفضائيه تجيلى
بجد ... وسعات لما اكون لوحدى ... اقولهم متجوش دلوقتى انا ممكن اخاف منكم لو جيتولى دلوقتى
دايما بتخيلهم وهما بيجولى بقا وابقا صحبتهم ومحدش مصدق انى بعرفهم
و ابقا حتجنن ... وعلشان كده نفسي لما اشوفهم اشوفهم ومعايا حد علشان
ما اتجننش لوحدى والاقي حد اخد وادى معاه
كلامى ده ملوش اى اساس او سبب علمى
علشان ونكى واكزوتك وميراج ... ميضربونيش بالنار
--------------------
هل لديك قوال اخرى
اه لدي ... النهارده حصلت حاجه مهمه جداا بالنسبه لي
انا كنت كتبت قبل كده زماان ان انا واللغه العربيه اتصالحنا
والنهارده حصلت حاجه فرحتنى مش منها نفسها لا
من ان ليها علاقه باللغه وبتقول ان في تقدم
وهى انى اخدت جايزه احسن تعليق
النهارده في دوره اعداد قاده الاتحادات الطلابيه في فرع الجامعه
التعليق كان عن اعدام صدام
قولت ..." اذا اخطأ الابن ..فلن ترضى الام ان يُعاقبه غيرها" نقطه
انا فرحانه لان الموضوع ليه علاقه بالعربي
عقبال ما اقرأ الشعر المكلكع بتاع زمان ده وافهمه
....
الي عايز يجاوب التاج ده يجاوبه علشان ما اغتتش على حد
بس خلاص
لا لسه ... مسموح بالضحك على الحاجات الي فوق دي
انما غير مسموح بالتأليس
انا قولت اهو وقد اعذر من انذر
9 comments:
مي
على فكرة انتى هربتى
انا بعتلك تاج و ماكانش التاج ده ولا اللى قبله
و لسة مردتيش عليه
الموضوع بتاع تلاتة في واحد فيه تاجين مش تاج واحد بس
انا بعتلك التانى
و هتجاوبيه يعنى هتجاوبيه
اهو كده .. بس
: )
معلش اتاخرت عليكي..بقت ماركة مسجلة اي حد يتاخر يبقي احمد عيسي ..ماعلينا
بوست جميل ومؤثر جدا و...استني كدة..ده تاج..طيب اقراه واجي اعلق عليه بقي سلام
بصي بقي...دي اول مرة ليا عندك ..واضح من كلامك انك مختلفة وبتفكري بطريقة جميلة...مبروك جايزة احسن تعليق في ..نسيت ..حلوة حكاية ماتركس..انا بعمل الموضوع ده لما اللمبة الحمرا اللي في دماغي بتزن واحس ان فيه حاجة مش طبيعية..
موضوع بقي انك تسيبي اثر فاكيد انتي حتسيبي اثر بس مش لازم بورفؤاد تغرق عشان يبقالك اثر
الكائنات الفضائية؟انتي من اللي مقتنع بالموضوع ده؟انا كمان..عادي يعني مستحيل يبقي فيه كون كامل مفيهوش ظروف حياة الا عندنا ..بس هو غرور الانسان الي مخليه فاكر ان الكون ده نخلوق عشانه لوحده
مش حطول عليكي المرة دي..اسمحيلي اني اضيف لينكك عندي علي البلوج..انتي كلية ايه اساسا ياخوفي لتكوني هندسة
اذا اخطأ الابن ..فلن ترضى الام ان يُعاقبه غيرها
فعلا ده احسن تعليق ممكن اكون سمعته عن اعدام صدام
موضوع الكائنات الفضائية ده معاكى اوى فيه
اصلى كان نفسى اربى ايه تى صغنن كده و ااكله خس
اما موضوع النمل انا مكنتش بنظر له بالانسانية ده انا كنت برازى فيهم
و احط صباعى افركش الصف و حاجات كده
بس اشيلها علشان النملة صغير ده محصلتش ( مصعبتش عليا بصراحة )
اصلى كنت بشوفهم دماغ و اذكياء خاصة لما بيكونوا شايلين حاجات ضعف حجمهم
كنت بفتكر عندهم عضلات بقى و كده زى بتاع كمال الاجسام
اما اللى بيقف ع الحيطة ده ...... و لا بلاش معرفوش
بس طالما كان نفسك تمشى على الحيطة ربنا يحققلك امنيتك ههههههه
اما الموضوع بتاع بورفؤاد لألألألألألألألألألألألألألألأل
ربنا يحمكيى يا بورفؤاد ... كل الجزر تتأثر من احتباس حرارى ألا بورفؤاد
دى بلد ابو العربى عارفين يعنى ايه بلد ابو العربى يعنى البسالة
يعنى الصلابة يعنى الارض حديد مش ممكن ابدا
ارحب بالسياح انهم يتفرجوا ع متعلقاتى بس ألا النظارة مبشفوش من غيرها
... ولد سيب النظارة هتصيبك لعنتى ههههههه
تخيلت القصص ده بجد هههه
ده انتى و انت صغيرة كنتى تحفة تحفة
ملحوظة : ( تحفة هنا بمعنى كويس )
تحياتى جوسى :)
انت جميله بجد
حكاية النمل دي مايعملهاش غير حد طيب أويي.
بالنسبه للكائنات الفضائيه فأنا مستعده اني أبقي معاكي لما يجولك, أصل أنا كمان نفسي أشوفهم أوي (:
دكتور احمد : انا مهربتش ولله بس بالدور
حيتجاوب كل حاجه
----------------
r2k:
:D
!
----------------
احمد عيسى 1
كان عندى سؤال بيقول اى بوست هو الي جميل ومؤثر
اكيد مش ده طالما مكنتش قرأته
!
----------------
احمد عيسى 2
يا مرحبا يا مرحبا
على فكره يا هندسه دي مش اول زياره
انا فاكره كويس
وثانكس على كلامك
والله يبارك فيك
حلو ان الواحد يشغل الضوء الاحمر وقت الخطر
بالنسبه لغرق بورفؤاد
وقت م شوفت التخيل ده
مكنتش لسه اعرف ان موضوع الاثر ده جوايا بالشكل ده
بمعنى ان التحليل كان عكسي
يعنى التخيل كان عندى ولما اكتشفت ان الاثر بيعنينى فسرت حلمى وحللته
بالنسبه لموضوع الكائنات الفضائيه
هو مفيش حد يقدر يجزم بوجودها او عدمه ... انما انا عندى تصور انهم موجودين
بمجرد حدس علمى
وشكرا على اضافه اللينك
وايوه انا في كليه الهندسه
(ايموشن تعباااااااان)
:)
تحياتى
مبرمج حر : كنت انتظر تعليقاتك
واضح انى حتوب عن الموضوع ده
(ايموشن بيعيييييييييييييط)
------------------------------
جوده:
معنديش خبر انه اى تى ياكل خس
!
اعتقد ان كلنا لينا ذكريات مع النمل
واحنا بنكتشف الحياه النمل بيكون من ضمن الحجات الي بنصورها بعقولنا
ونفكر فيها
مع اختلاف طرق تفكيرنا
مش حرد على الجزء الخاص بالحيطه
نقطه ابو العربي اختلف معك فيها حتى ولو كانت بهزار
يعنى التعبير عن بلدى بالصوره الشائعه دي
بيثير غضبي بعض الشيء
- مادام انا تخيلت ده
وانت كمان
اهو يمكن يتحقق
ولو انه مش حلم ده مجرد تخيل
تحياتى
:)
--------------------
اسرااااء : بقالك كتييييير معلقتيش عندى
انا بجد وشي احمر من كلامك
:)
واضح ان الكائنات الفضائيه بقت مطلب شعبي
عايزين نكلم الرئيس يحطها في البرنامج الانتخابي بتاعه الجديد
!!
تحيااااتى
:)
سورى ع موضوع شخصية ابو العربى
بس أنا قصدى الهزار
اما انا شخصية ابو العربى لو عرفنا اصلها طبعا ده توضيح للى بيزوروا المدونة من غير البورسعيدية
ابوالعربى شخصية نفخر بيها كبورسعيدية
هى شخصية و لقب اطلق على اهل البلد من المواطنين المصريين لان بورسعيد كان فيها جاليات اجنبية كان يطلق عليهم الافرنج و سمى الحى بتاعهم الافرنج
اما المصريين كانوا يسكنوا حى العرب و يطلق عليهم العرب و كان يحرص البورسعيدية ع تسمية ابنائهم باسم السيد العربى تفاخر باصلهم العربى و طلعت من هنا مسمى ابو العربى
لذلك افخر دائما بلقب ابو العربى
و فى موضوع الاحتباس الحرارى انا عارف ان بورؤاد معرضة للخطر ده و بقوة بس مش عايز اقتنع لأنى مش قادر اتصور الخريطة من غير بلدى اللى عشت و اتربيت فيها و يمكن اموت فيها
اما اى تى انا اكلته خس اشمعنى انتى كنت عايزة تمشى ع الحيطة فوتى ههههههه
و اخيرا سورى :)
السيد ابوجودة العربى :)
Post a Comment