Monday, February 06, 2012

الثوره مستمره في النفوس

كنت اتمنى يكون عندى رفاهيه الوقت علشان اقدر اكتب لحظه بلحظه وكل يوم ما يخص الثوره و اللي بعيشه
علشان و لادى يقرأوه لكن للاسف .., الاحداث اكثر تسارعا من انى اكتبها و انا بعيشها لكن حبيت اسجل الموقف بتاع النهارده
---
النهارده مجموعه من فريق سلميه كنا متجمعين في مكان علشان نبحث الخطوات الجايه
حصل اننا شوفنا ولد صغير بيبع مناديل واقف يتفرج على ولد - في مثل سنه تقريبا - بيلعب بلاي استيشن و هو متدفى جوه كافيه
الولد عنيه كانت حالمه جدا جدا
ندهنا عليه و اتكلمنا معاه و هذا ما قاله ..,
تعالى اسمك ايه : اسمى محمد
بتتفرج على ايه يا محمد : بتفرج على ده ..,
انت عاوز تلعب بلاي استيشن يا محمد : نفسي اوى العبه
انت بتشتغل امتى يا محمد : بشتغل من بعد المغرب لحد امبارح
ساكن فين : ساكن في كشك قريب من هنا
بص يا محمد احنا عاوزين ناخدك و نلعبك بلاي استيشن و تعمل كل اللي انت عاوزه
قولوا لبابا علشان يوافق ينفع تكلموه .., هنكلمهولك يا محمد .., كتبنا له ورقه فيها تليفوناتنا وقولناله احنا بنكون فين
الولد لوحده قالنا : هو انتم بتوع الثوره :):):) .., قولناله آه
انت عارف الثوره دي قامت ليه ..؟ قالنا ليه ..؟
قولناله : علشان انت لما تكبر تعيش كويس و تاكل كويس و تلبس اللى انت عاوزه و يبقا عندك بلاي استيشن زي ده في بيتك وتلعب بيه مع ولادك
الولد : انتوا علشان كده بتقولوا .., ارحل يا مشير ده الشعب فقير ..؟
ايوه يا محمد
و الله احنا حاولنا نروح معاه ساعتها البيت بس كان الوقت اتأخر
و المكان في منطقه صعبه شويه
كان عاوز يروح ينده لنا اخته نكلمها بس كنا خلاص هنروح
جبنا له حجات و كتبنا له ورقه فيها تليفوناتنا وكلمه لاهله
و سألناه عن اهله قال انهم بيزعقوا له علشان يسمع الكلام
سألناه بابا بيقولك ذاكر و قت المذاكره
قال انا في اولى ابتدائي
و بابا بيزعق لى علشان اذاكر
حمدنا الله و قولناله لو اختك مرضيتش تكلمنا تعالنا تانى و احنا هنروح لها معاك
طلبنا من صاحب الكافيه انه يلعبه جوه بس للاسف كان في الولد التانى بيلعب فمرضيوش

الولد خاف نكون بنقوله كلام وخلاص قولناله ده وعد يا محمد اننا هناخدك تلعب لاي استيشن لحد ما تقول انت كفايه خلاص زهقت

--
الثوره نجحت لانها في نفوس الفقراء :)
-------------
هنقح النوت بعدين