السلطانيه بتاعتى

يـــــــــــــــــــــــاه من زمان نفسي اجاوب السلطانيه بتاعتى

في الحقيقه اتبعت لي 3 سلطانيه 2 زي بعض

وواحد مختلف .... ودلوقتى حالا عرفت انه في واحد كمان

انا بعتذر جدااااااااا عن التأخير في الاجابه

وانا حبتدى بالاسئله وبعدين الحكايات

بس في الاول لازم اقول حاجه عن التاج

زمان قبل ما ادخل عالم التدوين

كنت بتفسح في المدونات بتاعت الناس الكبيره في التدوين

وكنت بشوف التاج ومكنتش لسه فاهمه ازاى بيبعتوه لبعض

وكان عاجبنى التواصل بينهم ..... اهو جه اليوم الي يتبعتلى فيه تاج واجاوب عليه

!!

يلا ... بسم الله

س: اية اللي حيحصل لايميلك لما تموت ؟

مفكرتش في الموضوع ده قبل كده

لكن اعتقد ايميلى ملوش معنى من غيري خصوصا انه

يعنى مفيهوش اسرار بقا وحجات كده

فيه ايميلات عاديه جداا

يعنى حياخد وقته ويروح ... يمكن افكر له في خطه تانيه

:D

س: اديت الباس وورد لحد قبل كده؟

مش فاكره بالظبط لكن اعتقد اه

س: لو اه كانت طبيعة علاقتك بيه اية؟

يعنى مره كان حد من الاصدقاء مثلا بيظبطلى المدونه او او

لانى مش شاطره اوى في تقنيات الكمبيوتر

س : اسمك؟

مي

س: اسم الدلع المشهور وسط اصحابك؟

اسماء كتيييييير

اولهم دبسي وده كان اسمى في جروب فمبد كوكس

دى كانت المجموعه بتاعتى وانا في اولى ثانوى

ودبسي علشان كنت بحب تيليتابيز

واسم الجروب ده اول حرف من كل اسم دلع لحد فينا

وفي كمان واحد اسمه

فيلو سوفيا

وده كان معمول ليه شعار وانا في 2 ثانوى

كان اصحاب يحينوى ويقولوا

فيلوسوفيا ... هاااى مع رفع الايدين بالهتاف

:D

وده علشان كنت بحلل كل حاجه لغايه لما اوصل لاسباب منطقيه

و اصحابي يحكولى مشاكيلهم بقا

ولا عبد الوهاب مطاوع

:D:D:D

واخيرا جوسي وده اختصار

لـ gooesbumps

اسمى على النت

س:عمرك؟

سنه 18

و3 شهور

س : برجك؟

القوس

و لا اعترف بالابراج

عن اقتناع تام

س: مجال دراستك؟

الهندسه المدنيه ان ان اااا اه ه ه

س : شخصيتك نوعها ايه؟

هو انا مش فاهمه

السؤال بالظبط

انا مجنونه شويه

مش بعتبر نفسي رومانسيه بالمعنى المتعارف عليه

بميل لتشغيل الدماغ وتحليل واستنتاج وكده

وفي نفس الوقت معاه احساس قوى

وتواصل

وسعات بكون موديه شويه..

اجتماعيه

يعنى ..

س : المود بتاعك؟

دلوقتى ... حاسه برضا جميل

انما عاده مليش مود معين

لكن الي بيغلب بيكون مود

كده جنون عقلانى .. مش عارفه حتوصل ليكم ازاى بس انا بحسها كده

"معادله صعبه"

س: وقت فراغك بتعمل فيه ايه؟

النت ... مؤخرا القراءه ... التلوين (بحبه جدااا) شويه تلفزيون

نادرا وللاسف انه نادرا شغل البيت

يعنى طبعا واصحابي اشوفهم او اكلمهم

يعنى حجات كتير

س: الاكلة المفضلة؟

اى حاجه طالعه من البحر

بدوووووووووووووس على طول

س:الصفات اللي اخدتها من بابا؟

مش حعرف اقولهم او اعددهم بشكل بحت

انما انا بحس انه عايش جوايا

بجد

س: اكتر6حاجات بتكرهها؟

امممممممممم

الاول: الغبـــــــــــــــــــــــــــــــــــاء مش بفهمه وبيجيبلي حاله جنون ونرفزه

سواء كان الغباء ده منى او من غيري على فكره

الثانى: الرووووووووتين بكل اشكاله

يعنى اى حاجه فيها رتابه او مفيهاش افتكاس او لمسه مجنونه او حاجه غريبه او مختلفه

انا حتى مقدرش اقعد في البيت وهو مترتب جاامد جداا وكل حاجه في مكانها اكتر من يومين مثلا

ومعرفش اذاكر لو الكتب مرصووووصه من غير حركه قدامى

مش عدم حب للنظام لا بس لازم اكسر النظام ده بحاجه

الثالت: نـــاديه الجندى ... بجد مش بحب احس انى بكره حد بس الست دي بتخرجنى عن صوابي بتمثيلها المفتعل

وخالتى بتسلم عليك

الرابع : اممممممممم انه اي حد يستخف بذكائي او يسمح لنفسه انه بمعنى بلدى

يعيش عليا ... لانى طيبه وممكن اصدق حجات ساعتها انما محصلتش لغايه دلوقتى انى مكشفتهاش حتى ولو بعد فتره

ان مكانش منى بيكون من ربنا ومن حيث لا ادري ولا اعلم

الخامس:النــــفاق ... يـــــــاه بيبان في العيون اوووي

بجد

السادس : الزحمــه المصحوبه بدوشه وياسلام لو حر

بتعمل مشكله رهييييبه عندى بجد

يعنى بردو حجات كتير مش بحبها مش بس 6

اه افتكرت دلوقتى التعصب الاعمى لاى حاجه

س:اكتر 6 حاجات بتحبها؟

البحر والشتا والخريف والغروب

في حاجه مكنتش حاسه بمتعتها قد اليومين دول هى حب الناس

يعنى منى انا .. انا لما احب الناس

بحب الافتكاسات والحجات الغريبه

بحب دراستى ومعاها الفلك والتنميه البشريه

بحب الحسين والاثار والحجات القديمه خصوصا المشربيات و الشكمجيه والحجات المعموله من الفضه والنحاس والخشب

يعنى كل الي ليه الطابع ده

وبحب التفاصيل ... كل تحليل روزا بتاعى كده

بحب النجوم وبحب كوكب المريخ جداااااااااااااااااااااااااااا وبجد معرفش السبب في موضوع المريخ ده

:D:D

يعنى

حجات كتييييير جداااااااا

مش بس 6

س:السفر؟

متعه ... نفسي الف العالم كله عن طريق البحر

بحب اوى اعرف عن ثقافات الناس ولبسهم والفلكلور بتاعهم ورقصهم وموسيقاهم

وطريقه حياتهم

الموضوع ده بيستهوينى جداا

بحب فيه كمان تحمل المسئوليه وانك تشيل مسئوليه نفسك

س: هل لديك اقوال اخري؟

انا اتكلمت كتيـــــــــــر جدااا اصلا

ف كده كفايه اوى

ابعت التاج لاى حد عندى متبعتلوش التاج ده

رفعت الجلسه