Wednesday, April 07, 2010

الـشُــربه في خوربه الشـعب


النهارده رجعـت بذاكرتى سنتين للورا ..,

يوم اليتيم من سنتين .., نفس المكان نادى الجامعه في بورفؤاد الجميله

..نفس التاريخ .., اول شهر ابريل .., نفس الميعاد .., على الساعه 5 بعد العصر كده

طفل صغير .., يتيم وبريء

عسكري امن والله بردو بريء

الطفل : يا مااااماااا عسكري .., و خد ديله في سنانه وقال يا فكــــــيك

العسكري : بيضحك .., شقااوه عيال

انا : تربست ومش هتتـفتـح لاجيب الوااد واعمله درس مهم ان والله العسكري كـائن اليف

انا : تعااالى يا ابنى .., انت خايف من العسكري ليه .,

الطفل : بخوووف .., كده ..,

انا : طب تعالى هنسلم عليه ..,

الطفل : لااااااااااااا

انا : بص ده بيضحك اووى وجااي يشارككم في الحفله ( هو في الواقع كان في سبب تانى – بس بلاش نخرب فطره الولد )

الولد : اندهااااش وحواجب مرفوعه لفووق

- وااحده وااحده بدأ بصعوبه يقتنع .., ويقرب من العسكري

- العسكري بدأ يفتح له اديه ويقوله تعالى

- الولد بتردد يقرب ويبعد ..,

و بعد عذاااااااب .., ومجهود قرب الولد .., مد اديه .., وسلم ..,

وطلع الولد يجري في وسط اصحاابه يهلل ويقول ..,

سلمت ع العسكري .., سلمت على العسكري

وبقا طووول اليوم رايح جااي يسلم علييه .., (( مطلعش بيعُـض اهوووو ))

- كنت متخيله الحقيقه اني بكده سبت اثر في حياه الولد اما فهمته ان القـطنه مبتكذبـــ...,

قصدي الشرطه متخـوفش

اممم

كنت من سنتين وبعد الموقف ده في دماغي سؤال .., هو مش الشرطه دي مهمتها حمايتنا من الحراميه والمجرمين اللي ( بنخاف منهم ) طب وهو احنـا ليه بنخاف من العساكر ., الظباط ., المخبرين .., وكل من هو تابع للبتااع ده اللي اسمه قسم شرطه او اي حد كتفه تقيل حبتين.., مين علمنا كده .., هو احنا من زماان اووي كده بنشوف عساكر الامن المركزى وهي مقطعه المواطنين من الضرب ..؟!

بس السنه دي في الحقيقه مش شاغل بالي غير بس سـؤال

هو العسكري فعلا (( مش بيـعُض اهووو ..,؟)) زي ما كنت عايزه اعلم الولد .., ولا احرص على نفسي و اما اشوفه احود من الشارع التانى ....؟!