النهارده كان عندي ميعاد مع صديقه
مكنتش (شوفتها) من زمان
اتفقنا نتقابل في احد الكفتريات المحترمه الي في بلدي الجميله
بورسعيد
وعليه تركت جزيرتى الاسيويه بورفؤاد وركبت المعديه متجهه لبورسعيد
ولحسن الحظ منتظرتش كتير والمعديه طلعت ولما نزلت كمان لقيت تاكسي بكل سهوله دون انتظار
المهم بسبب ده كله وصلت قبل ميعادى بخمس دقايق وهى بدورها اتأخرت عليا
خمسه زيهم او اكتر شويه
(مسمحاكى من كل قلبي)
المهم ان في العشر دقايق او الربع ساعه دي
كنت واقفه طبعا بنتظرها
وعليه
حصلت على كميه من نظرات اللوم والاحتقار المغلفه بسوء النيه
لا بأس بها
واظن ان وقفتى المتحفظه
والتعبيرات التى رُسمت على وجهي
منعت ترجمه تلك النظرات الى كلمات
(ده كده الحمد لله اوى يعنى )
كنت بضحك جوايا واقول في نفسي دلوقتى حيطلع نابكم على شونه
وفور وصولها اخبرتها بنظرات الاحتقار
ردت وقالت يمكن علشان الفلنتين قرب
قولت اااه صحيح د انا لابسه احمر
مع ان مكانش معايا هديه !!
وسألت نفسي سؤال
هو الطبيعي بقا هو الي مش طبيعي اليومين دول
تصدقوا حاجه غريبه بجد
غريبه وشاغله بالي جداا
موقف مشابه حصل لاتنين من اصحابي البنات
زيي كده بيحبوا البحر جداا
راحوا يقعدوا عليه سوا
وبدأ مسلسل الاسئله
اجيب ليكم كرسيين ولا اربعه
طيب اتنين لمون ولا اربعه
طب اتنين ذره مشوي ولا اربعه
وكأن الناس بالبياعين من كتر يقينهم
شافو اربعه قاعدين بدل اتنين
و بعد صراع طفشوا وروحوا ولم يكتمل استمتاعهم بالبحر
حاجه غريبه
وتانى وكأن الطبيعي بقا هو الغير طبيعي
وكأن الناس شاطره في التحليل واستخراج النتائج
وعندهم من قوه الحاسه السادسه
انهم يستنتجوا النتيجه الهايله دي
!!
انتو عارفين انا بكتب الكلام ده هنا ليه
يجي الولد الي في مدونه تفاصيل بتاعت على الالفي
ويقولي
ليــــــــــــــــــــه.....؟
ارد عليه واقوله
علشان تكون شاهد عليا انى ابداً ما افكرش كده
ولو في مره شطانى وسوسلى او نفسي حاولت معايا
اقولها لأ ...
في مليون سبب وسبب
لوضع زي ده
دايما عقلي يحسن الظن زي ما اسلامنا علمنا
يـــا كده يا انت مالك اصلا بفلان هنا ليه وبيعمل ايه
اه
يا كده يا انت حر
ولا انتو ايه رأيكم.....؟
!!!
17 comments:
معاكى حق طبعا
المفروض فعلا حتة حسن الظن دى
بس هتقولى أيه للبشر اللى ماعندهاش
دم إلا بس عشان الشيطان يجرى فيه
هههههه يعني انا بلوم نفسي .. لأني لو كنت أعرف كنت جيت بالظبط في الميعاد .. درء لباب مفسده و نظرات ملهاش لزمة .. بس عندك حق .. الخطأ هو السمة العامة .. و الصح هو إللي بقى شاذ للأسف ..
بس كان يوم تحفة ..
مبرمج : اه ادينى جيت قولت هنا مع انى كان نفسي اقول الي قولته ده لكل حد شافنى امبارح
سعيده بزيارتك مجددا ... وانا مش ناسيه التاج على فكره
روزا: انا قولتلك انى مسمحاكى من كل قلبي :D
وبجد كان يوم تحفه ... انا ممكنتش عايزه اروح اصلا
:)
اه وانتى كمان يا روزا انا مش ناسيه التاج
تحياتى
العنوان مالوش حل يا جوسي
اعتقدت لفترة أن الناس بطلت تشغل مخها .. بس في الموضوع ده بالذات مخها يعمل بسرعة الصاروخ ويبني استنتاجاته على سوء النية
ربنا يهدي الجميع
ويبطلوا سوء نية ..
موضوع مهم يا جوسى فعلا
و بعدين مش حركة يا روزا
اصلى انتوا عارفين انى بحب اهدى النفوس
المهم : برغم من ان الناس اللى بتفكر كده قد يكونوا معذورين لان الشئ بقى الغالب جدا فبقىى الصح يفسر على انه هيكون السائد و برضه تحول الناس للسطحية
فاصبحوا ينظرونا بشكل غريب عكس انه مثلا فى المثال اللى قولتيه ( سيماهم فى وجوهم)
يعنى لو نظر بعيد عن السطحية هيعرف يفرق بين الكويس و الوحش
و كمان لو بصينا ليه الناس سيئة الظن لان الثقة انعدمت
و تحول افتراض حسن النية إلى غباء و هبل
وسوء النية إلى حرص واجب و غاب الشرع فى حكم العلاقات بين الناس و غاب ( حب لاخيك ما تحب لنفسك )
ماهو اللى بيعمل كده لو فكر ان ممكن ينظر ليها لو فيميل كده مش هتعمل النظرة ده او لو شخص لو فكر ان بنته او زوجته او اخته مش هينظر النظرة ده
بس أنا متفائل خير انه بقدر وجود الناس ده فيه ناس بتتعامل صح زى ما ديننا بيقول
اللهم انى اسألك انا تحينى بالاسلام و انى تميتنا على دينك دين الاسلام و اللهم اهدنا إلى ما فيه خير المسلمين يارب
ازيك فوكيرة
اخبارك اية
شوفى انا ضد الرغامة والانسان اللى يحشر نفسة فى حاجة لاتهمة من قريب او بعيد
شىء سلبى فعلاا اللى بيحصل دة كل واحد حر يجلس يقف يختار الحاجة اللى هو عايز يعملها ومش من حق اى انسان تانى يدخل فى حاجة تخصنى او يحاول استعرض خدماتة ارفض هذا مادام انا لم اطلب منة خدماتة
معلشى فوكيرة هنعمل اية فية عادات غريبة عندنا واعتقد انة مش سهل نتخلص منها مرة واحدة
تحياتى
ازيك فوكيرة
اخبارك اية
شوفى انا ضد الرغامة والانسان اللى يحشر نفسة فى حاجة لاتهمة من قريب او بعيد
شىء سلبى فعلاا اللى بيحصل دة كل واحد حر يجلس يقف يختار الحاجة اللى هو عايز يعملها ومش من حق اى انسان تانى يدخل فى حاجة تخصنى او يحاول استعرض خدماتة ارفض هذا مادام انا لم اطلب منة خدماتة
معلشى فوكيرة هنعمل اية فية عادات غريبة عندنا واعتقد انة مش سهل نتخلص منها مرة واحدة
تحياتى
كايند : ربنا يهدينا جميعاا وانا معاكي في ملاحظتك
الناس بتشغل دماغها وقانون الاحتمالات يطلع ويتلغى منه كل الاحتمالات و يتبقى واحد مفيش غيره !!
جوده:لما دخلنا الكفتريا ... عزرتهم شويه لان مكنش في غير انا وروزا بس الي بنتين قاعدين مع بعض .... ربنا يهدينا جميعا ولم استثنى نفسي فسعات كتير الواحد بيقع في الخطأ ده
تامر : انا الحمد لله تمام
نورت مدونتى
انا مش ضد انه حد ينصح حد احنا كلنا اخوات في الاسلام
لكن على الاقل اتيقن باسليب التفكير الصحيحه انه في مشكله تستحق التدخل
وثانيا مراعات اسلوب التدخل
مش النظر للناس من منطلق انى ملاك والباقي شياطين
لان كل البشر عندهم استعداد للخير وللشر كمان
اما عن تغيير العاده ... فحعتبر الفوكيره دي بدايه
ان ابدأ بنفسي والفت نظر من حولى لده
وواحده واحده زي ما الغلط بقا هو الطبيعى
يكون الصح هو الطبيعى بنفس مراحل التغيير
تحياتى للجميع
اولا احب احيكى على اسم البلوج بتاع
فوكيرة
لا بجد اسم حلو وليه معنى واسمحيلى احسدك عشان انتى ساكنة على البحر وفى القارة الاسيوية
وبصى بقى بالنسبة لموضوعك ...احمدى ربنا ان مش فى حد رخم واترازل بكلمة كدة ولا كدة واستظرف لان دى بقت عادة عند اى حد حتى وان كاننت البنت دى واقفة بكل احترام بس كل دة يرجع للتربية وفكر الناس اساسا اللى بقى متحجر يعنى احنا لو تمسكنا بديننا فى الاول وبعد كدة عاداتنا وتقاليدنا بعد كدة ونبطل اننا نستورد كمان العادات والتقاليد من الخارج ..هيكون الوضع داخل بلادنا تمااااااام جدا وكل شىء سوف يسير على ما يرام
وبالنسبة لكرسيين ولا اربعة او تنين لمون ولا اربعة والكلام دة فاكييييد اللى كان يقصده هذا الشخص الرخم من وراء كل دة انه يعنى انتم اتنين فهو اما انهم يعنى مستنين اتنين كمان او انه يجى ويقعدمعاهم ويجيب وحد صحبه تانى
ههههههههههه
لا املك شىء سوى ربنا يستر على البلد دى
والسلام.........
the eagles: سعيده بزيارتك الاولى
وثانكس على تعليقك على اسم المدونه
واحسد يا سيدى براحتك بس هو انا مش ساكنه على البحر اوى يعنى :D
انا فعلا حمدت ربنا على كده وجداا
كمان باحييك على استنتاجك ان العيب فينا .. في الشعب والناس لو احنا اتصلحنا بجد كله حيبقا تمام
والحمد لله على انى كنت في منطقه تعتبر من المناطق الراقيه مش بس في بورسعيد لكن مش حبالغ لو قولت في مصر
هههههههههههههه حلوه اوى يجى يقعد هو وصاحبه على اساس انها تكيه
عامه لو كان فكر يعملها كان حيبقا يومه اسود
(انا عارفه اصحابي )
:p
سعيده بزيرتك الاولى وتعليقك المجدي
انا نسيت اقولك ذكرياتى الطويلة فى بورفؤاد
واللى انا رحتها تقريبا على ما اتذكر بس مرتين
مرة كنا بنخرج عادى بنتمشى فرحنا للمعادية وكدة وعدينا الناحية التانية والمرة التانية دى بقى مهمة جداااااااااااا
لانى لما كنت بودى الملف بتاع التنسيق بتاع الثانوية العامة سلمته فى مكتب تنسيق بورفؤاد
شوفتى بقى ذكرياتى فى بورفؤاد طويل قد ايييييييييييييييه
هههههههههههههههه
والسلام..........
ينهار ابيض كل ده
:D:D:D:D
بس موضوع التنسيق نقطه فاصله في حياه الانسان
اهلا بيك وبكل زوار بورفؤاد او بورسعيد في اى وقت
تحياتى
جوس باميس
شوفتى عرفت انطقا ازاي ؟
هو انتى من بورسعيد زيي .. اخيرا اتلقيت حد من الباسلة
هههههههههههههه
طب احنا نعمل موضوع مشترك عن المصري بقي .. بهزر طبعا
بس والله عندك حق لان ده اللى بيحصل غالبا ناحية اي حد بيستنى حد .. انا نفس كنت اقعد قدام المعدية مستنى صحابي الاقي واحد صاحبي جايلي يقولي ايه ياعم انت جاي تقابل ولا ايه ؟؟؟؟
هو سوء الظن بقى هو الطبيعي .. و حسن الظن بقى هو اللى مش طبيعي
بعد كده هعلق على صدري يافطة مكتوب عليها ان بعد الظن اثم
ههههههههههههههههه
تصدق يا احمد ولله فكرت فيها
بالنسبه للمدونين الى من الباسله فهما كتير ... ومدوناتهم احلى من مدونتى كمان بكتير
تقدر تتواصل معاهم من اللينكات الي في مدونتى ... معظمهم من بورسعيد
بلدي
تحياتى ... واهلا بتشريفك الثانى
:)
لأ عداكي العيب طبعا
سعيده بزيارتك جدا يا كراكيب الرقيقه
ايه ده مين فين ليه ....؟
اسفه على الخطأ الغير مقصود
يا هانى
واهلا بزيارتك لاولى لمدونتى
Post a Comment