وداعا ..أشر.. اهلا بــ اين

وداعا يا كل ما هو ... (اشر ...) يعنى سبعتاشر

تمنتاشر .. تسعتاشر ...

واهلا بكل ما هو ( ايـن ...) يعنى عشرين واحد وعشرين

اتنين وعشرين

كل سنه وانتى طيبه يا بنتى ... السنه اللي فاتت دي نهايتها كانت غريبه

عرفت عنك حجات مكنتش اعرفها

واستغربت .. ووقفت كتير مش فاهمه

متفـتكرنيش متضايقه بالعكس ... انا عجبانى اوي فكره اكتشافك

انتى عارفه اني اصلا بحب ده ...

حــاسه ان السنين الجايه مخبيالك تعب كتير

ومتعه اكتــر ... هتتعرفي عليكى اكتر مع الوقت

وتثقي فيكى اكتر لما تكونى عارفه اكتر عن خباياكي

وتكتشفي متعه جديده في الدنيا ... الحياه لسه بتبدأ يا بنوته

انتى ماشيه على طريق يمكن مش عارفه اخره بس حاسه بيه

انا بجد بحترمك جدا .. وبحبك جدا ... وسعيده انك انا ..مهما حصل

thanks 4 being u girl :)

كــل سنه وانتى طيبه ... لأ كـل عشرين سنه -وقعها غريب اوي - وانتى طيبه

وكويسه و شويه حجات حلوه كده

:)

سفــر

الدنيا كانت منوره اووي

على طريق سفر

فيه كل 100 متر حادثه

فـــــجـأه

الدنيا ضلمت والنجوم طلعت

.



.



.

الحـادثه الـ 100 متر دول
كانت من نصيبي

!

امبــارح

اول شتواايـيـه

.

.

.

.

وحــشتنى اووي

stop 4 new starting

.

لمــا يحصل معاك موقف ويتكرر كتير

من نـاس كتير مختلفه والمشترك بينهم انت

والموقف ده يسببلك ألم في كل مره بيحصلك

يبقا الألم و التكرار عايزين يوصلولك رساله مهمه

انت في حاجه محتاج تتعلمها علـشان ده يبطل يحصلك

وتبطل تحس بالألم ده

لمـا دوره ينتهى وانت تتعلم

وعلشان كده ده محتــاج وقفه مهمه

تعمل فيها حاجتين ...الاولى تدور على الرساله ورا اللي بيحصلك

وتلاقيها وتتعلم منها

و الثانيه

تكسر فيها نظامك اللي بتحبه

و تبنيه من جديد ... بالمعطيات الجديده ...

عـلشان تبدأ تواصل من تاني

الحيــاه

.

.

ربي لك الحمد كما ينبغي لجلال وجهك وعظيم سلطانك

امبارح تمت سنتين

(ا)

(2)

مدونتى حبيبتى

امبارح تميتى سنتين بالظبط

ممم عايزه اقولك اني بجد بحبك اوي

برتاح فيكى اوي

كبرت فيكى و افكاري كبرت واتعلمت اوي

وكـل لما برجعلك اكتب او اقرأ او اتفاعل بتعلم

انتـى كنز حقيقي ...ضروري احافظ عليه واكبره

بكل لحظه وكـل فكره وكل خبره واحساس بمر بيه

او بتخيله

اتعلم الدرس وافضفض وانمينى من كـل المستويات

لانك اكتر حد بيخلينى اقعد معايا اكـتر ..افهمنى ..احبنى .. واتعلم مني ومن كـل حاجه بتحصلي
او بتخيلها او بحسها

بجد من قلبي.. شكرا

انا مـش حطول عليكى اكيد وراكي مليون حاجه تعمليها

:) بس اعرفي اني بحبك اوووي

واعرفي انك في وسط اصحابي صديقه مخلصه بـ حق

بحبك

--------

تحديث

عيب اوى اللي انا حقوله ده

بس انا كل ده وانا عايشه حياتى سابقه الزمن

على اننا في شهر 10

عيد ميلادها 11-10

:)

خير يعنى بقا عندك بدل العيد عيدين

دو ري مي

دو ري مي
...
هكـذا شعرت بهـا
وهكذا أنـت ... منسجم ...شفاف
ورقيق...

هادئ ..كتلك الموسيقى الشفائيه الخـالده
التى تخرج من قلبك لأصابع يديك
النــاصعه

شـشششش... انصت الى لحنى

دو ري مـي...

انتبه...!

فـلحني ولحنك منسـجمان

استمع الى صـوت العزف مُجتمعـاً

.

.
دووو ريـي مــيي

فعزفي كصدى لحنك

امتداد طبيعي لوجودك ... لوجود الكمان بين يديك

.

.

هـــــنــاك ...

تركت آلتي

وتستطحت على اريكتى البيـضاء الكبيره

استمع الى لحنك دون صداه وادندن بصوتي معك

...متأمله حركه اصابعك وكأنها تحركني

... وابتسم
وتبتسم ...

مومئاً لـي بـأن قومي و خذى آلاتك وادعميني بصداكـي وصوتك
انهض سعيده... و نعزف كلانا مـبتسمين
لحننــا المــنسجم وصداه

.

.

...تخــرج

و اتسطح على اريكتى ادندن لحنك حــتى الصـباح
:)

...

.

الحــريه

بيضــــــاء ...ناصعه البياض

طـفله سعيده ... تلهو بدراجتها وتتبعها خصلات شعرها المفرود بلا رباط

صقر يشق السمــاء

نــورس ممشوق الجناحين ... يعبر في حاجز الهـواء كـالسيف بحده

فحتى حاجز الهواء الهين لا يطيقه

قفزه عــاليه مطاطيه... بلا جازبيه

آه ه ه عـــاليه ... لا تدع سكـان الارض ينامون بسلام

سمــاء لا يدرك نظرك حدودها

بحــر بلا شاطيء

رجل راشد ... وامرأه في كامل عنفوانها

جـواد يرمح بلا لجـام

!!ضـوء قمـر ...تسير عليه حتى تصبح ...هنــــاك

ضـــــــحكه ماسيه

قـلب سعيد

عقل مفكـر

قدرات لا تعرف لها حدود

اكتــشاف

نـور ثم نــور ثم نـور

الحـريه

عــقيده اتقنها ... كـما تتقن الفتيات الانتظار

اسلوب حيـاه

برائحه النعناع ونشاط الصبـاح وفرحه المحبين لحظه اللقـاء

صحوه الطـاعه

سجــده قلب خاشع

من كونك عـبد لرب الحريه تنبع طاقه حـريتك
من كونك (عبد) له وحده ... لك حريتك فهي حق لك من عند الله
الحــريه هي نـور قلبي ... وضي طـريقي

فـ اجعلها في قلبي ومن حولي يا الله

---------

لعلنا نقدر قيمه الحياه ونحن احياء

اعتقد حياتنا حتختلف كتــــير

بتفــرح اوي

لــما تــنوي تاخد وقفه

.

وربنا يساعدك

وتاخدها فعلا

وبعدين تـجني ثمارها

توصل للرضــا

ومن بعده السعــاده

وتقول لنفسك في المــرايه بثقه

صباح الفل يا قمــر ...شكلك حلو وانتى سعيده

وسعادتك مفرحاني ومطمناني عليــا معاكي

الفــتره من 19-7

لـــ24-7

فتــره مهمه في حياتى لازم تتسجــل ...علــشان اشكر ربنــا واشكرها واشكر ناس كتير

لما اجني ثمارها الي شيفاها اهي بتتابع وبقيتها اهو جاي في الطريق

عنـدما تحب

عندما تحب فإن رموش عينيك تبدأ في الصعود والنزول وتخرج نجوم صغار منها

بلون الالماس ... تتلألأ وهى تخرج من لمعان عيناك الصغيرتان

تُــصدر صوتـا سحريا ... كذلك الذي نسمعه مباشره بعد ألقاء التعويذه في حكايات الكـارتون

اذا اشتقت الى من تحب ... تسقط منك دموعا كـالذهب

لتصنع بركه من الكنوز ...اسفل قدميك ... تتأملها لترى صوره من تـحب تسطع على سطحها

وحين تمــطر السـماء

...تركض تحت المطر بجنون

ثم تقفز عـــــالـيا لتتزحلق على قوس قـزح ...وتأخذ منه قطعه ..تتذوقها

وتستمتع بمذاق الحلوى اللذيذ

وانت تــلهو على السحب البيضاء المطاطيه الناعمه

...تـأخذ نفسك بين ذراعيك ... وتحتضنك بشده

وتعود لتفردهمــا وتطير ... تطــير

لتعود وتسبح بين النجوم الصغار التي كانت قد خرجت من بين عينيك

عندما رأيت حبيبك في الصبــاح

واستقرت هناك ...على تلك السجاده الزرقاء الكبيره الموجوده بالسماء
تـــطير وتطير ... بابتسامه و فرحــه بداخلك

في وسط السكون الازرق ...تنعطف وتدور
وحين تعود الى الارض
تـاخذ نظـره الى مكانك بالأعلى ... لتُـفاجىء بأن عدد النجوم قد ازداد اليوم كــثيرا
تنام كـالملائكه ...بابتسامه مشرقه
... سعيدا بان عدد المتحابين في تزايد مستـمر

من غــير زغاريد

كــل يوم في ليله ظهور نتيجه الثانويه العامه

وبعد مـا النتيجه تظـهر بدقايق

تبــدأ تسمع الزغاريد كــل شويه كده

تسمع زغروده ( الكلمه دى غريبه اوى ) ممم

امــبارح بقا ...ليله النتيجه السنادى

!!! كانت ليله من غير زغاريد

مـش حقول اكتر من كده

.

.

.

تــبـاً

عــندما يكــون لك الحــق

كــل الحق في شيء مــا

من كـل الزوايا.. دينياً , منطقيـاّ واجتماعياّ

ولا تـستطيع اخذه ...لانه ببساطه امرك (مش بـأيدك) وقتها

فقط

تشعـر بالــعجز والاحتياج لا بـل (الحــوّجه)...ممم

احــساس يجعـلك تثــور

وتقــرر تنفيذ ما اردت تنفيذه

واخذ حقكك رغم عن انف الجميع

بــقرار جريء ومباشر

واصــرار على التنفيذ

حــتى لو لام عليك النـاس بعد ذلك

((حــتبقى بينك وبينك راضـــــــــــــــــــــــــــــــــــــــــــــــــــــي))

الانســان

...عــــارف

جوه قلب البـحر ... في اعماقه بعـيد

في كنــوز وعـالم مليان ..غـريب ومــبيـنتـهيش

ميـستـمتعـش بجـماله غير الي حـابه

...وعـنده شــوق يكــتشـفـه ويعــرف جـواه ايه

انـت كـمـان كـده زيه ... جـواك كـــتير

انســان لا محدود

فخــليك من الي بيحبـوا

...يـــكـتشفـوك

:)

سنيمــا

طاقه بكـاء مخزون بين الضلوع

تذكره سنيمــا

فيلم مؤثر
.

.

بــــكاء

.

.

.

بــاب الخروج

صوتك يدندن بأغنيه التتر

...وينتهي كـل شيء

وطن جماعي

اذا اردت يومـا ان لا تشعر بالغربه

... فقط...

ارفع رأسك ...

وانظر الى السمــاء

فالفضــاء >>>وطن

موبـايلي الجديد

اليوم تبدأ مرحله جديده .. هل سأتمكن الان من تسجيل اللحظات ..
اخيــرا حصلت عليها ... حصلت على كاميرا
امل ان تفي الـ 3.2 ميجا بالغرض...
هل سـأتمكن من تسجيل المشاهد لتخرج في مخرج اوسع من حيز رأسي الضيق
هل سـأتخلى عن امنيتى المستمره في ان يشاهد الجميع الصوره التى هي في رأسي
مبـاشره بعد ان اغمض عينى واتمنى ذلك
هل سـأستطيع التقاطها كما هى في رأسي
هــل ستكون لي اصداراتى الخاصه عن من يسميه المصريون

" يبقا انت اكيد في مـصر "

كــم انا سعيده لذلك
وكم اخشى على جهازي من تخمه الصور الديجــيتاليه
كم انا سعيده بموبايلي الجديد

الذى ستُـرسم عليه شخصيتى فيكفي ان تحمل موبايلي لربع ساعه

و"تتفسح فيه شويه" لتعرف كيف افكر

فهذا هو نوع الاغانى الذى افضله
وهذا .. صوت قارئي المفضل
وتلك هى خواطري التى غالبا ما اكتبها في الشارع اثناء السير
و في وسائل المواصلات
مممم وهذه هى النغمات المخصصه لاصدقائي كما احبها

..." على مزاجى "

- انظر بشماته لموبايلى القديم الذي كان يجبرنى على استخدام نوع معين من النغمات

التى كنت اكرهها بشده
واشعر انى كـــشعب مصر ذو الموبايل الواحد والرنه الواحده ماركه نوكيا ...
عندما كان يرن موبايلى القديم ينظر الجميع لشاشات الموبايل للتأكد من ان الرنه

" مش عندهم "
وافعلها انا يضا
حين يرن موبايل احدهم ...
يالها من ذكريات لعينه ..
اوووووف ... ربما احتاج الى اطلاق اسم على موبايلى حبيبي الجديد -
!!ما علينا دلوقتى

اعود لشخصيتى الموبايليه ..
مممم
تلك هى صوري التى احملها من فليكر
وهذه هى ذكرياتى مع اصدقائي
وهذه هى مجموعتى "يبقا انت اكيد في مصر" من تصويري الخاص
مممم في المره القادمه التى ارى فيها رجل على وشك السقوط من على حافه حائط عماره
ولا ادري ان كان احتياجه للمال كافي لاقناعه بالصعود الى هناك ... سأتمكن من تصويره
وفي المره القادمه التى ارى فيها سفينه العالم او يخت شراعى "يهبل" ... سأتمكن من تصويره
صوري الخاصه ... نعم
في المره القادمه التى ارى فيها احد عساكر المرور وهو بياخد رشوه

في وسط شوارع القاهره سأتمكن من تصويره .
واي شيء غريب ...كالأزياء الجديده الخــاصه بالشباب والتى تفوق تلك الخاصه بالبنات غرابه
ولكــن هل من حقي... هل كل من حمل كاميرا او موبايل متطور له حق في تصوير خلق الله وافعالهم
في الشوارع ...
ااه من التكنولوجيا
لا يـهم .... فسـأقوم بالتصوير مهما كانت نتيجه هذا التفكـير

كــل ما اعرفه الان هو انى سعيده بتلك الخطوه التى انتظرت ثمنها طويلا

يملأني الحماس عن ما ستدونه كامرتى الخاصه ... وما سيحمله موبايلي الجديد الذي لم أطلق عليه اسم بعد

أعلنها من الان انها مرحله جديده أكثر عمقا في تسجيل الاحداث بمعنى ادق

( تاريخى الخاص بالصور )

كــل ما فات هو استحضار لاحساسي بالموبايل الجديد

"الي لسه مجاش"

ربما يكون له نكهته الخاصه ... حين يأتى
...اتذكر الان كلمات روزاليا

( لما تعوز حاجه اوى تشوفها اوى حتحققها اوي )
موبايلي الجديد ... انا جيااااااااالك اهو

:))

اشــمعنى هــو يعنى ...

مهـو اصل كل واحد وخصوصا الجيل الي قبلينا ده

نفسه ابنه يطلع زيه ... زيه على اساس طريقه يكون ممهد بالخبره والعلاقات ...

طب واشمعنى هو يعنى ... !!

الدكتور عايز ابنه يكون دكتور

المهندس عايز ابنه يكون مهندس

...دكاتره الجامعه و الصنايعيه كمان

مـــا عادا الممثلين ... يقولك اصلي بعد ما شفت متاعب المهنه ... منفسيش ابنى

...يتعذب فيها

واهو كويس الحمد لله ان الراجل مطلعش ممثل

وان المهنه متاعبها مش كتير اوى ... يعنى

...فـ اشمعنى هو يعنى

...المشكله بقــا

انه يطلع ابن الوز عــوام

ومشكله بردو لو طلع ابن الــوز

...مش عــــوام

ممممم ... طب ونحل المشكله دي ازاى دلوقتى ...؟

-----------

(تحديث...(البوست عن التوريث والاعتراض عليه من القله المُندسه

صــعب

صــعب ان تجد نفسك واقفا

هنــاك

على حدود الشعره التى تفصل بين المتناقضات

ممم ... والاصعب

.

.

ان تقتنع بـأن وقوفك هناك هو الصواب

وانه المكان الاكثر امانا للوقوف

وربما السير

!!

حجات كتير

حجات كتـــير اووى

ملـــخبطه ... وانا تايهه جواها

وخايفه

ومدرســتى وحشانى اووى

...بشكل غريب

يـــــــــــــــــــــــــــــــــــــــارب

يــــــــــــــــــــــــــــــــــــــــــارب ... يا حبيبي

....لا تـُفقدنى حلاوه حمدك

تلك اللذه التى اشعر بها في اعماق قلبي

لا تـُفقدنى اياها رجاءا

يـــا رب

كـــنا ســوا

كـنت في حاله غريبه ... مضغـوطه بدرجه مش طبيعيه

لدرجه اني مش قادره اسمع حد ولا حتى قادره اتكلم

مكنتش حتى لاحقه افضى الي جوايا علشان اعرف استوعب من جديد ...

مممم

بـس كان نفسي اروح لها من اكـتر من سنه .. رغم ان الظروف مجمعتناش قبل كده

وكنت بس بطل عليها من بعيد ..

الا انها صحبتى وبتوحشنى اوى اووى اووى

ممم وجه الوقت اخيرااا

سيبت كل الالتزامات وسيبت الدنيا وروحت لها

وقعدنا ســوا..قعدنا على حصيره ازرق في احـمر

متقونه اوى

وطارت بينا الحـصيره وركبنا اله زمن

وفجـأه لقتنى بسـمع لهـا

وحصل وحكتلى ... عن ايامها ولياليها

غناها وسهرها .. تفاصيلها

عـراقتها واثرها الباقي ...

قـد ايه اصيله .. وحضنها دافي ... ومليها الذكاء

مممم...

وفرجتنى على حجات ياما

....وشدتنــى منـها اوى

حرفي شــاطر في ورشته مندمج اوي في شغله وحابب الى بيعمله
صوت الدقدقه في ايده مزيكا دايبه في دوشه السوق

ووقت الصـلاه ... والشوارع فاضيه والمساجد

والكتاتيب بصوت الهدوء المنتظم
بتفاصيها مليــانه خلق... وليها روحانيات خاصه
بريحه الــورد

و حكايات خيال الظل

على القهوه العتيقه هناك

في ليل نسيمه منعش والقمر بدر منور

ونجــوم كتير في السما مرسومه وبتلمع اوى

وتعبيرات وشوش مستمتعه ومتفاعله مع الحكايه

ومبسوطه بالـسهر واليل

ممم...

وحصل وعشقتها بعد ما شفتها

رغم انى كنت في الاصل بحبها

...

..

وسهونى .. واخدونى منهـا فــجأه

ووعدوني انى حرجع لـها تانى

وحنقعد مع بعض اكتـر

وحتحكيلي اكـتر ... وانا حسمع لها مهما كانت ضغوطى

اه ... مهو انا اصلي بحبها

...

حتوحشنى تفاصيلك .. الوانك .. ناسك

وحواريكي بـأرضها المقسمه الاصيله

وجــدرانها الفخمه المبهره

...بناتك بطرحهم الـناعمه المكسوفه الطاله من مشـربياتك

وريحه الورد فيكـي ... ورد الحكايات النضر القديم

تجـــاعيد وشـك الـشاب بحواديتها

وحضنك الدافي

المليان اثـر وغموض وسـحر

..

.

-------

الصوره الى فوق من تصويري الفظيع

من رحلتى لمصر القديــمه (صحبتى)الاخيره

اكسير التفاؤل

من حوالى قرن من الزمـان ... كنت ضمن الناس الي طلب منهم

احمد ..( مبرمج حـر) يحلوا التـاج ده

ومن يوم ما قـرأت اسمه جاوبته عندي ...

وبيتهيألى معدش ينفع اأجل وجوده على المدونه اكــتر من كده ....

التـاج كان عباره عن انك تكتب ايه الحجات الي في حياتك ... بالنسبالك اكسير تفاؤل

-----

لـما تتكلم مع الدفعه الجديـده ... وتتصاحب عليهم .. وتحكيلهم عن الحياه الجامعيه -

وتبص اوى في عيونهم وتلاقي محورهـا انت... تحس انه وجودك في الحياه مهم .. وله معنى

ده اكــسير تفاؤل

لمـا تدعى ربنا اوى علشان حاجه عايزها .. وتلاقيها بتتأخر .. فتبقى بتدعى وانت زعلان ..

وتحصل حاجه تقولك .. ان الحاجه دي مكانتش خيـر ليك .. تترسم على وشك ملامح الكسوف

وتحـمد ربنا وتقوله شكرا يـا رب... انت كنت عارف اكتر مني

ده اكــسير تفاؤل

لما تدعى ربنا بحاجه انت عايزها بردو .. وتلاقيها بتحصل قدامك وبقت حقيقه .. يــااااه

بتفرح ساعتها انه ربنا بجلاله سمعك وحقق لك الي انت عايزه .. وتفرح بده اكتر من فرحتك بتحقيق مرادك نفسه

في الفرحـه النقيه دي ... اكــسير تفاؤل

لما يكون في مشروع خيري .. وتلاقي النـاس بتجري .. الف مين يشارك

تفتكر قول الرسول عليه الصلاه والسلام ... " الخير في وفي امتى الى يوم الدين " صدقت يا رسول الله ...

اهو ده اكســـــــــــــــير تفاؤل

لـما تبص حواليك وتلاقي ان في فحياتك .. اصدقـاء مخلصين .. جدعان اوى .. بيحبوك اوى

لانك انت انت وبـس ..

ده اكسـير تفاؤل

لـما تتأمل الدنيا من حـواليك وتشوف الـبــــــــحــر و السما

الورود .. الاوان والبلاد والبشـر ... يقين جواك يقولك سبحـانك يا رب يا خالق كـل ده

الحــمد لله انك موجود ... الحـمد لله اني بعبدك انت ...

اهو وجود ربنا ده ... اكــبر اكسير تفاؤل

لـما تكون واثق اوى اوى في حكمه ربـنا وقوانينه في الارض حتى

من غير ما تشوف .. ومن يقينك ده تلاقي ربنا اهو بيوريك انت يا ضغيف حكمته

ده اكسير تفاؤل

لــما تبص للسماء والنجوم وتحس انك عارف دروبها وحواريها ... وتلاقيها ثابته معاك في اى عالم او مكان غريب ..

ده اكـسير تفاؤل

لـما في يومك تعمل حجات كـتير اوى .. وتبقا تعبااااااان

وفي اخر اليوم تقول الحمد لله .. وتنام وتحس المعنى الحقيقي

لراحه الضمير ... في احساسك ده اكسير تفاؤل

لما يكون في حياتك العدد ده من اكسيرات التفاؤل .. وتبقا عارفها ومدركها وحاسسها ... ده في حد ذاته

اكسير تفاؤل

لـما تقابل ناس لسه عندها ضمـير ... اكسير تفاؤل

لما تقابل ناس لسه دماغها حلوه وبتفكـر ... اكسير تفاؤل

لما تتعرف على نـاس لسه مؤدبه ومحترمه وعندها اخلاق ... اكسير تفاؤل

لمـا تقابل الي لسه حلمه عزه الاسلام والمسلمين و حيـاه احسن لكل بنى ادم ... اكسير تفاؤل

لـما تكلم او تسمع ... حد مش على دينك او جنسيك .. مختلف عنك و تلاقيه بيحكم على الامور بموضوعيه ... اكسير تفاؤل

لـما انت تلاقي نفسك نجحت في انك تحكم على حاجه بموضوعيه ... اكسير تفاؤل

لـــما تلاقي نفسك من الناس الى قادرين يشوفوا اكـسير التفاؤل في حياتهم . وفي غيرك مـش عـــايز يشوفه ... اكسير تفاؤل

لـــما تترمى في حـضن امك ... اكسـير تفاؤل

الصــلاه والقران.. اكسير تفاؤل

الشــــتاء اكسير تفاؤل ... وخصوصا قعده البحـــر المنعشه في الشتا

اكـــسير تفاؤل

دراستك .. شغلك .. عنيك .. ايدك ..لسانك .. عقلك ... في وجود كـل دول وغيرهم ... اكسير تفاؤل

الفرح والحزن ...التعب والراحه ... الانشغال و جزء من الفضا ... اكــسير تفاؤل

اكــبر اكسير تفاؤل .. لمـا تكتشف في نهايه التاج ان الحــاجه وعكسها في الدنيا دي بالنسبالك اكسيـر تفاؤل

بس المهم انت بتفكـر فيها ازاى ..بتستقبلها ازاى ... والاكثـر اهميه انـه ربنـا دايما موجـود ...

----

انا مـش بحب احدد حد بعينه يجـاوب التاج ... بس بجـد انا نفسي اى حد يقرأ التـاج ده يجاوبه

لسببين ....

1- اننا نتشارك مساحات التفاؤل في حياه بعـض ... ممكن حد يلفت نظرك لحاجه انت مكنتش شايفها

فتزيد عندك المساحه دي ... يعنى نستفيد من اختلافنا

2- انـك كـل لما تكون متضايق اوى ومخنوق ... وتفتح الصفحه بتاعتك وتقرأ اكسير التفاؤل الخـاص بيك او بغيرك

احساسم حيختلف ومودك حيتغير ..(متجربه ) على فكره

لو انت حد قرأ ومعندوش مدونه ... ممكن تجاوب التاج في اى ورقه عندك وتعينه في درج المكتب وتستفيد بالسبب رقم 2

اه على فكـره كوني اشاركم البوست ده وانتوا تقـرأوه

ده اكــسير تفاؤل

:)

حـــمار ...لامؤاخذه ...؟

اذا حــد جه في يوم وقالك يـا

حـــمــــااار

...متـسيبش الـموضوع متعلق كده

....روح اتحـقق من الاشــاعه دي ... لحسن تطلع الحــكايه جد

...بـــص في المـرايه

...اذا لقيت حــمار ...ازعل اووي وحــاول تلاقي حل للمشكله دي

...لــكن لو لقيت نفسك بنى ادم عادي يعنى

يبقا فوكك ... وكــمل المشــوار

وانت بتحمد ربنا انك بني ادم ومش حمـار

الـــحـمد لله

تـطلُع

يــا ترى في ايه هنـاك ... ورا الشـمس

زمــــان

...زمــــــان

كـــنت هنا حــره

العـاصفه تشتد

هــاهي العـاصفه تبـدأ من جديد ... او ربما تشتد اكثر من مـا هي عليه

في لياليها الـعاديه .. التى اصبحت تبدو لي الان اكثر صـفاءا

...

لا ادري ... لحسن الحظ ام لسوءه ... انا مضطره لـ إنهاء تلك العـاصفه في وقت قياسي

بـإتخـاذ القرار فورا ...دون ادنى فرصه للاستجمام

.

.

اممممممم

ربــنا يستــر

.

.

.

ســجل يا تـاريخ

في وسط فتره غريبه ... بمر بيها ... فيها احساس قوى جدا
بعدم الرغبه في التدوين هنا
خـــــــالص ...
زلزل هذا السكــون حدث رهيييييييييييييييب

غرييييييب .. مُرييب

.

.
مكنش يووومك يا فوكيره ...

ااااااااه ياني على الي جراالك

بقا انتى يحصل فيكـي كده ... من غيير علمك
يــــــــــــــالـ العــار
يـادي الفضيحه امو جلاجل
يادي الجرسه امو حنااجل
ااااااااااااااااه ياااااااااااااااااااااااااني .... يــارب ايه الي حصلي ده ...
ليستحييل ابدا ... مش ممكن .. لا لا لا لااااااااااااا

لاااااااااااااااا

لــست انا هذا الــرجل ... ولن اكوون

ابــــــداااا
.

.

الـ انا قـاعده لا بيا ولا عليا ... بناقش مع احد اصدقائي مشكله ازمه التدوين الي اصابتنى دي
ولقــيت اخويا داخل من باب البيت وبيقولي
.
.
.
انتــي عملتي عضويه في الحـزب الوطني

قولتله :لا ممكن ابدا ... قالي: خدي
!!! واداني كارنييه الحزب
وفجـأه اترفعت حوااجبي لفوووووق ... لفوووووووق ... لفوووووق

وازبهلييت وتنحت
ايه ده ... امتى ..؟ وازاى ...؟ والله العظيم ما عملت ...والله العظيم اخر مره روحت مقر الحزب كنت

بحجز كورس
ومـروحتش اخدته كمــان

انــا مقرأتش برنامج الحزب ولا اعرف سياسته ... علشان اقول انه وحش او حلو
بس انا كـ باقي الشعوب ...
عندى موروث شعبي .... ان الحزب وووحش... وووحــش
وانا شخصيا عندي ومش مستعده اعيد النظر.. انه حاجه متصحش ابدا العضويه دي ... وكل الي يسألنى عندى عضويه فيه ولا لأ
اقول له : فـــــــــــشر وانا وش ذلك
لا ممكن ابداا

واذا هو الخبر ينزل عليا كــالصاعقه ...

اخويا قالى اني اديت بياناتى لحد من اصدقاء والدي يعملهولى ... بس انا الحكايه دي مش في ذاكرتى ابدا
ازاى يعنى اكون بقول كده للي يسألنى على عضويه الحزب ... واخلى حد يعملى عضويه

عندي شيزوفرنيا انا يعني ولا اييه ...؟

وهو اصلا ينفع حد يعمل لحد عضويه في اي مكان ...

لا وخدوا المصيبه الكُبري ... اني مطلوبه علشان ادي صوتى في انتخابات داخليه خاصه بالمحليات باين ...

ينهاار ابيض .. ينهاار ابيض ... الله يمسيك بالخير يا مدحت يا شلبي

ومبروووووووووووووك لمصر ...

مكنش يومك يا فوكيره

يا شماته ابله ظاظا فيااا

اعمــل ايه انا دلوووقتى ... عااااااااا

حــقيــقه

((لــو مش احنـا احنـا مكانش حيبقـا هما هما ))

اه والله العظيم بـجد

حقيقـــه وحفضل اقولها طـول عمري اول و تـاني وتـالت

عـارفه اني اتكلمت علنها هنا قبل كده

بس تــاني
((لــو مش احنـا احنـا مكانش حيبقـا هما هما ))

ان كـان الي بيحصل فينا من حــكـامـنا العـرب و لا الي بيعمله الاسرائليين في اخواتنا

ولا امريكـا ولا ولا

ده بسبب عمايلنا الســوده وعمايلهم كمـان

بجد احنا حـالنا بقا يقرف ...

عمــر مــا المشاهد الي فوق دي مـا حتنصلح ... الا لما نبدأ كـل واحد فينا بنفسه ... يلتزم بمبادئه هو على الاقل.. بقناعاته... واخـــلاقه

و يطبقها صح

ممـكن نغلط اه.. ده طبيعي ... بس بلاش نخلق اعـذار

خلينا نحاول كل واحد فينا مع نفسه يكون احسن

كفـاياها بقا الارض ... تعبت بقالها كـــام سنه

بتصــرخ بالــعربــي ...

نفسي مـره
اصدق قول الشاعر

ان ...الارض بتتكلم عربي

--

انا حاولت اختار صوره واحده للبوست بس الي

حاصل متنوع اكتر من اني اختصره في صوره

اكبر حتى من اني اختصره في صراع اسرائيل

وفلسطيـن زي ما غالب في الصور...اكبر من انه يكون بسبب الحرب وبس

الجروح بقت كتير

جـوه وبره وفوق وتحت وعلى الجناب

--

انا مش حقعد حزينه في بيتنا

بس ححاول وبحاول احزن على حالنا بطريقه غير البكا

ححاول وبحاول بجديه اكون احسن

علشان اكون جزء من التغير

تــاني ...

((لو مش احـنا احنـا مكانش حيبقا هـما همـا ))

وانا معنديش استعداد استمر على احنا

الي احنا فيها دي ... والله المستعان

--

خــوف

اسـتكشـاف ماليه الـخـــوف و الحمـاسه من حـاجه
منعـرفهـاش