Sunday, November 20, 2011

اعلام بديل في الشارع



احنا تعبنا بجد ...
لو في حد مؤيد للثوره ومش عارف يروح التحرير ..,
نرجووووك اعمل اعلام بديل للناس
فهمهم انهم مش بلطجيه ..,
فهمهم ان حق الاعتصام ده مش جريمه .., فهمهم انهم ثوار ..,
فهمهم ان المخرب و البلطجى والمأجور عمره ابدا ما يصمد اكتر من 48 ساعه تحت الضرب ..,
ميعملش كده غير صاحب القضيه ..,
فهموهم انهم هناك بيضحوا علشان انا و انت وللادنا نعيش محترمين وعندنا كرامه ..,
فهموهم ان الثوره صعبه ولازم كلنا ندفع التمن ..,
فهموهم ان الشرطه مش بتسترجل غير ع الثوار و بس ..,
كانت فين كل القوه دى الخرطوش والمطاطى و الغاز قصاد البلطجيه ..,
فهموهم ان الولاد دول دمهم في رقابتنا كلنا ..,
و انهم لو روحوا وانكسروا الثوره خلصت ويبقا اجمل ما فيها اتقتل ..,
عرفوهم ان في ثوار فقدوا عنيهم في ال18 يوم وفقدوا العين التانيه امبارح ..,
ميعملش كده غير صاحب القضيه

Tuesday, November 08, 2011

كنتى عارفه من الاول



من يوم ما فتحتى عنيكى ع الدنيا
وبدأت خلاياكى تخزن الاحزان
ومخك يميز الحكايات
كنتى عارفه ان حياتك هتكون متعبه

فاكره مدرس العربي في ابتدائي قالك ايه ..؟
طب ومدرسه الرسم بتاعت ثانوى ..؟
ودكاترتك و اصحابك
وانتى نفسي ياما قلتى لنفسك كتير ..,
.
.
.
ايوه لسه مش لاقياكي ..,
لكن ...
شـايفه طريقك قدامك مرسوم .., و عارفه انه صعب
بس مش عارفه تمشي في طريق غيره ..,

طب زعلانه ليه دلوقتى .., خايفه خيالك يحبسك ..؟
خايفه خوفك يمنعك تعيشي وانتى عمرك ما كرهتى حاجه آد الخوف ..؟

اوعى تخـافي تحلمي وانتى اللي بتعلمى الناس اصول الحلم
.
طب و هتعملى ايه يعنى ..؟
كنتى عارفه من الاول
فــ متوجعيش دماغي بقا

Saturday, November 05, 2011

حزن ليله عيـد


هـا هو عيد جديد

و انا وحيده ..,
بدونك .., بدون سند
بلا اب ولا اخ ولا حبيب
مؤلم ان تبكي ليله العيد ..,
مؤلمه هى الحياه حين تشهر جميع اسلحتها
الشرعيه كانت اوالمحرمه في وجهك
تخرج لك لسانها .., و تقول لك - اذا كان عاجبك -
تعتاد الألم وتخشى ان لا تتعرف على السعاده حين تلقاها
ولكن تبقى
طبطبه الله هى الملاذ و المأوى
تبقى متمسك بان الله يراك .., يعلم بحالك
و تنام على امل ان تضحك لك الدنيا يوما
واثقا في عدل الله

Saturday, September 17, 2011

في ذكرى صبرا و شتيلا


كان طفلا صغيرا .., يلعب نعم كباقي الاطفال
و لكن اذا نظرت في لمعه عيناه .., ترى حلم العوده
ترى روايات ملأت صدره وقلبه من الاب و الام ,الخال و العم
عن هذا الجميل الذى لم يساعده الوقت على ان يدرك حتى وجوده ..., وطنه " فسلطين "
ترى اصرار و قسوه امتزجت ببراءه طفولته
كيف لا و قد تربى على قصص الحرب ,المجازر .., و قصص اغتصاب الوطن وانتزاعه منه ثم طرده ليكون كما هو الان .., لاجئ ً

في ذلك اليوم الذى لم يكن يعلم انه سيكون عصيبا
16-9-1982

سلم على والده .., نظر لامه حينها خائفا

فربتت على كتفه وهمست في اذنيه بـ ان والده بطل وان هذا هو قدر الرجال
الحرب من اجل الوطن .., و بانه حمل على عاتقه حلم تطهير الوطن .., من اجل ان نعود جميعا .., لننعم بحضن فلسطين وفي ظل شجر الزيتون

اطمئن قليلا وابتسم.., قبله والده
واحتضنه بشده بين ذراعيه
ثم ذهب الولد الى الفراش وهو يفكـر في ما قالته امه
.
.
.
بفزع استيقظ الولد من نومه
على صوت صراخ .., رصاص
وقنابل
و ثوان قليله لم يتمكن فيها حتى من الركض او الهروب

كان شهيدا ..,

اصبح في لحظات كـما قصت امه عليه طويلا ولكن
دون ان يصبح مثل والده " مُقاتل " ..,

تقول الروايه ان عدد الشهداء في مخيم صبرا وشتيلا قد فاق الثلاثه
آلاف شهيد ..,
و ليس فقط بل انها كانت من ابشع المجازر التى عرفها
التـاريخ .., كان فيها ليس قتلا و فقط بل اغتصاب و تمثيل بالجثث
كانت انتقاما شرسا و عنصريه واضحه و كـره معهود

لنتذكر ونعرف من هو العدو دائما وابدا

ولتعلم مصر الثوره .., ان هذي مسئوليتنا .., حلم النهضه ليس فقط من اجل مصر
وانما
للوطن العربي كله و على رأسه ابنه مصر المغتصبه الشريفه
فلسطين
وان بعد الثوره لم يعد لطم الخدود ابدا كافيا
فلتكوني يا مصر .., لـيكون العرب

ولتعلم اسرائيل جيدا بـ اننا
لن ننسى .., اذا نسى الحجر لمسه الندى
قد ننسى .., اذا نسى النبات كيف ينمو قد ننسى .., هذا انا و في نهايه الطريق انت
____________________
شاركوا اطفال فلسطين

http://www.youtube.com/watch?v=IJsOZoHNmno&feature=share
طفل فلسطيني صغير يقاوم إعتقال الإحتلال لوالده
www.youtube.com
http://www.nilenews.tv/ - الثلاثاء 3 أغسطس 2010 الإعتداءات الإسرائيلية : طفل فلسطيني صغير يقاوم إعتقال الإحتلال لوالده كما يظهر براعة إستخدام الميديا في إظها...

Wednesday, May 25, 2011

الخبز و الحريه معا يا كل من يحكمنا .., والله دي ثوره بجد يا ناس


الخبز و الحريه معا يا كل من يحكمنا .., الثوره المصريه تستحق .., عارفه اننا يمكن لسه مش عارفين نتكلم مع بعض من غير ما نزعق لبعض .., و عارفه اننا مش عارفين لسه نتوحد حتى حوالين مطالب

و عارفه ان الاخلاق في مصر لسه محتاجه ثوره تانيه .., و عارفه وعارفه وعارفه ..,

لكــن عارفه كمان .., ان نظام كان بيخرب عقول ناس لمده 30 سنه .., بيمنع اى اصلاح من انه يتم .., اللي بيحلم بيضيقوها عليه يا بيطفشوه يا بيشوهوه .., شعب خلوه ميشوفش كادر واحد قدامه .., شعب خلوه يتحاصر و يحس ان مفيش غيرهم اصلا يحكمهم.., شعب اعتزل السياسه و الاخبار .., وبقا عايز يهلس و بس ...,
شعب حصل فيه كل ده .., وانتفض .., قام وقال لا .., وقدم لمصر اكتر من 800 شهيـد.., ده شعب يستحق انه يعيش في عدل وكرامه ..,

شعب يستحق ان يتعمل له حساب .., شعب من حقه ياخد فرصته .., شعــب يستحق الخبز و الحـــريه معا ..,

.

.

احنا اما بنقول عاوزين نروح التحرير .., بنتحمل عبء السفر .., بنتحمل مصاريف واحنا اصلا مفلسين .., بنتحمل مشواار مفاااوضات يرفع ضغط اى كائن بشري مع اهالينا

بنتحمل مسئوليه القرار .., بنقرأ الاخبار و بندعى ربنا ينور بصائرنا علشان نشوف صح ..,
بنتحمل المغامره والمخاطره ومواجه اى شيء مجهول ..,

تفتكروا هنتحمل كل ده ليه ..؟؟ .., ممكن مثلا نكون فااضيين مش لاقين حاجه نعملها ..؟؟ !

ولا لاننا شايفين ان هى دى مصلحه مصر

انا لسه معرفش المفااوضاات ايااها اللي بتفرع الضغط دي هتودينى لفين .., ويوم الجمعه هكون سافرت ولا لا ..,

بس انا عارفه ان اى حد مقتنع ان الثوره مستمره .., و ان الثوره لازم تكمل .., لاازم ينزل .., لازم يبزل كل طااقته علشان ينزل ..,

انا عارفه .., انى لازم انزل علشان

- علشان في ناس عماله تاخد خمستشاارااات واحنا طيبين بنفرح .., وبعدين منعرفش بيحصل معاهم اييه .., وعماالين يااخدوا براااااءه .., !!

- عــلشان مفيش محاكمات بتهمه الفساد السياسي ..., علشان في نااس ظلمتنا و تعبتنا .., آه سكوتنا كان جزء من المشكله .., بس احنا اتكلمنا خلاااص وصرخنا بأعلى صووت .., من حقنا بقا نحل المشكله

- علشان المحااكمات دي تبقا " عــــــلنيه " .., من حق مصر كلها تشووف وتسمع اللي بيحصل مع اللي ظلموهم واستعبدوهم وسرقووهم .., و حتى لما قالولهم لا .., مش عاااوزين يسيبووهم ده اييه الفُجر ده ..؟؟ اييه ده ..؟ علشان اييه ..؟

- علشان عارفه ومؤمنه ان شعار الثوره دى " الشعب يريد " وان الشعب لو اراد هيتفذ ارادته .., مفيش حاجه اسمها مبارك و حاشيته مش هيتحااكموا علشان مش هينفع .., في حاجه اسمها " احنا عاوزين ايه " احنا الشعب و المفرووض نريييييييييييد

- علشان يوم 25 يناير كان يوم " قصدنا بيه نعكنن فيه على بتوع الشرطه في عيدهم " اللي زلونا وقرفونا و تعبونا و ماحترموش آدميه المصريين .., و لان لحد دلوقتى محدش منهم اتحاكم غير امين شرطه و حتى حبيب محبوس تربح..., لا وايه..., قله الادب كمان رجعت تاني ..,

- علشان حبيب محبوس بتربح و كسب غير مشروع وآل ايييييه .., عيله مبارك براااءه .., يالهوووى اما هما براءه امال انا اييه ..؟؟

- علشان جهاز الزفت الوطنى ده .., عايزين عليه اشراف قضااااااااائي وحقووقي زي البلاد المحترمه بقاااااااا

- علشان لسه في نااس بتتشتم علشان مظاهره وبيتقاال لها " انزل على ركبك يا ابن كذااا "
والشباب بيدخل محاكمات عسكريه والمخلوع وحاشيته يقولولنا القضااء و الحفاظ ع الثوره بيضاء

- علشان الاعلام المصري لسه مش محترم .., مش محترم اطلاااااقااا .., احترموا الثوره واحترموا دم الشهداااااء .., مينفعش تبقوا بتذيعوا افلام وهلس ..., المفروض تذيعوا برنامج توعيه كاامل ومحترم .., المفروض تبطلوا نفااااااااااق

- عـــلشان في ريحه واحسااااس في الجوو شبه بتاع زمااان .., بتاع المخبرين و الرقابه الغير مبرره .., الجووو اللي يحسسك انك مخنووووووووق و البلد مش بلدك ده ..,

- علشان المصاارحه والشفافيه هي الحــل

- - علشان العدل و الحق والحريه ..., هيخلينا نشتغل وهيخلى اى حد يفكر يسرق او يظلم يعتبر من قدوته الكبييييير و اللي حصل له
.
.
.
الجمعه دي انا شايفه انى لازم انزل علشان كل اللي فوق ده .., و اللي جاي

- علشان زي ما كنت بقول ايام مبارك .., اللي يدى تنازلات للشعب علشان هما ماسيكن له كرباج مش علشان هو ده الحق والعدل .., مينفعش يفضل ع الكرسي .., اسفه وموجوعه وقلبي بيوجعنى وانا بقول ان بجد ((((لو كل اللي فوق ده محصلش ))))انا هضطر اطلب الطلاق يا مجلس و اقول عاوزه مجلس رئاسي
و عااارفه انه لسه ملوش آليه و لسه ملوش توافق وطني بشكل كبير

هبنيها زي ما هتثورج.., ومتحمله المسئوليه ..., بشتغل و بفهم وبذاكر وبحاول اخد بأيد غيري وافهمه .., بحلم لبلدي و بدعي ربنا يعينا على كل ده .., مـــــش هنكر حاجه على حد .., كلنا بنحب مــصر وكلنا هنقف جنبها بأي وسيله

مـــش هفرط في حريتى بعد ما لقيتها .., مش هفرط في دم المصريين اللي ماتوا لان ده مش من حقي ..,مش هفرط في
حــق ولاااااااااااااادي انهم يعيشوا بنى ادمين .

Thursday, May 12, 2011

يـا ابنه مصر المُكبله


فلسطين ..,

الحلم القديم ..,

حلم الصبا .. والدعاء " اللهم ارزقنا الشهاده على اعتاب المسجد الاقصى " .., ياااا صلااح الدين انتظرناك طويلا

يا حـــريه ..,

فلسطين

حبيبتنا .., نتحدث عن الكرامه ,العزه ,النهضه والتقدم .., و تبقين انتِ دائما ألماً في القلب

تبقين حلمنا الضائع .., النقطه المظلمه التي لا يكتمل الضياء الا بهـا.

الا تشعر بالانكسار طالما كانت هي بعيده عن ضمـه صدورنا ..؟

لا تكتمل حريتنا الا بكِ .., كتبت عليك القيود بذنوبنا .., نخطيء ووحدك انت تتحملين العذابات

حبيبتى .., غصه اشعر بها كلما تخيلت الشهداء القادمين .., و اضفتهم على من سبقوهم .., ولكن

لا رجووع .., حتى وان ذهب فدائك الكثيرون .., فـ انت حقا تستحقين .., ومن غيرك يستحق ..؟

فليكونوا هم الشراره الجديده ..,

لابد ان تنتفضي .., و ليكن ما يكون .., انتفضي ونحن قادمون .., انتفضي ونحن داعمون

ادعموا الانتفاضه الفلســطــينيه

بالمساعدات الماديه ,

بالدعـاء ,بالصيام , بالتهجد ,بالطــاااعه , بالايمان , بصلاه الفجـر ,بالمحافظه على الحريه والكرامه.., بحمل القضيه , بـ بناء العقيده

و بالــــحرب

فلسطين .., يا ابنه مـصر المُكبله ..,

حتماً سيجيء الوقت ..,

وتعودين بـأيدينا الى احضاننا ..,

http://www.youtube.com/watch?v=8ajDgudMC18&feature=share

النشيد الوطنى الفلسطيني

احفظوه .., رددوه .., تغنوا به .., تخيلوها حُره .., انظروا الى انفسكم وانتم تقيمون الصلاه في الاقصى الحُر


Monday, April 25, 2011

تــحرر


واجه اوجـاعك .., احترم لحظات ضعفك ..,تحرر من دموعك المحبوسه جواك و وجعاك..,لتبدأ من جديد
" وجع ساعه ولا كل ساعه " ..., :)

Friday, April 01, 2011

ملنااااش غيرك


يارب انت ورتنى حجات كتير وعلامات ..., علشان مزعلش لو الثوره مكملتش .., عارفه ان في ناس من الثوار مش بيصلوا
وفي منهم وانا اولهم بنعمل اخطاء كتير

عارفه وشوفت ان الجهل كتيير اووى .., واننا حتى لسه مش عارفين نتقبل بعض اوى

عارفه ان في ناس باعت القضيه

وفي غيرهم الثوره عندهم مش اولويه .., وفي اللي ماشي مشغل الكاسيت بصوت عالى ومسقع دماغه

واللي خارج يعمل شوبنج وبيقول نعم للاستقرار ..., واللي خارجه مع اصحابها وفي البيس

عارفه ان قليلين اووى اللي شايلين همها ومقدرين ان دى فرصه انت اديتهالنا ومش هتتعوض تاانى بسهوله

بس ياااارب انت عارف اننا مش قد الكسره دي ..., يارب انت عاارف اننا متحملين المسئوليه بجد

يارب احنا كنا بنشتغل ونعمل توعيه ونتظاهر .., وخايفين ع البلد بجد من جوانا اوووي
يااارب انا عارفه اننا يمكن مش كتير كفايه

وعارفه انه يمكن الآوان مجاش وانت رايد لنا خيير احسن
انا سلمت امري ليك يارب وعارفه انك هتجبر بخاطرنا وهتطبط علينا
عااارفه انك بتختبر صبرنا وجديتنا وبتطلع احسن ما فينا ..,

واثقه انك شايفنا وسامعنا وعارف كل صدق في قلوبنا ..,

واثقه فيك اوووي ياارب
يااارب انت قاااااااااااادر اووى واحنا ضعفااء اووى من غيرك ..,
ياااااااااارب اقسم ياارب انى هفضل شايله المسئوليه ومش هنسى ..,
وانت عالم يارب ان جبر خاطرنا هيدب فينا طاقه هتطلع مصر 10 سنين قدام

يا حي يا قيوم .., برحمتك استغيث .., اصلح لي شأني كله

ولااااااااا تكلنا الى انفسنا طرفه عين

بيك انت يااارب مش باي حد تانى .., هنكمل وهننتصر

Tuesday, March 22, 2011

رسالتى الى د محمد بديع المرشد العام لجماعه الاخوان المسلمين

سيدي المرشد .., تحيه طيبه وبعد

..,

في حقيقه الامر كنت دائما وابدا ادافع عن حريه التعبير عن الرأي .., اعرف انك لا تعرفني ولكن باستطاعتى ان اعطيك عنواني واسمي .., وانت تعلم كيف لك ان تسأل شباب الاخوان في محيطي عني ..,

كيف اني لم اقبل ظلما يقع عليهم قط .., صحيح اني لم ارفعه عنهم ولكني حاولت

كيف اني كنت اشيد بهم اذا فعلوا شيئا جيدا واشاكسهم اذا فعلوا عكس ذلك ..,

واقول لهم

– اتلموا بقا لو عملوا حاجه مش هتأثر ايجابي بس هتضرهم وخلاص –

بعد هذه المقدمه الطوويله اتمنى ان ابدأ معك بأن تقرأ كلامي على انه حيادي تماما .., بعيد عن اي تحامل عليكم بسبب الدعايا السلبيه من قبل النظام السابق عنكم

انا يا سيدي المرشد في حاله عشق مع فكـر حسن البنا الاصل .., وازعم انني لو كنت عايشه في الاسماعيليه سنـه 27 كنت هكون اول امرأه انضمت وآمنت بالفكر الاصل

ولكـن يا سيدي ما حدث في مصـر عام 2011

كان حدثا مؤسفا سيتحدث عنه التـاريخ .., بعد الثوره اتفق الجميع على ان يكونوا ضمن ائتلافا لضمان " مكاسب الثوره و حمايتها " ولنستمر هكذا حتى يأتي وقت الانقسـام .., حتى تكون الانتخابات ويعود كل منا الى توجاته وايدلوجياته السياسيه الخاصه لنضمى جميعا مختلفين في الفكر ومتفقين في مصلحه الوطن ..,

اذن طالما الخيار على الارض يخص الثوره ومصلحه الوطن فيجب ان نعمل بمبدأ الشورى ثم الديمقراطيه والتي تقتضى بالسير وراء رأي الاغلبيه حتى يأتي وقت الخلاف السياسي

ولكنكم سيدي المرشد .., انقسمتم باكرا ..,

خرجتم عن الشوري بين القوى الوطنيه واكتفيتم بالشورى فيما

" بينكم " ..,

ودافعتم عن ما توصلت اليه الشورى – فيما بينكم –

بكل ما هو غالي

– ورخيص –

اذا حدثنى السيد عصام العريان عن انكم كنتم رد فعل للتوجيه الاعلامي لرأي اغلبيه القوى الوطنيه في اتفاقها لحمايه الثوره .., فلن اصدقه

والسبب الوحيد والاوحد هو ان عنواني سيدي هو ..,

درب التبانه - كوكب الارض – مصر

فـ انا المواطن الذي كان يمشي في الشارع ويستمع ويحاور شباب الاخوان ويرى ويقيم ما يفعلوه ويشااهد التلفزيون ايضا وبيقعد على تويتر

واقسم انني حينها لم اكن قد اتخذت قرارا بعد .., كـي اتحامل على من يخالفني الرأي

– هذا ان كانت هذه هي القاعده –

وتقييمي ان من خالفكم هو من كان رد الفعل ..,

لندع كلامي الفارغ على جنب .., ولننقاش ما قاله السيد عصام العريان .., كيف لجماعه بهذه القوه وهذا النضج والتاريخ

ان تكون رد فعل للخطأ ..؟ ! كيف تقع في الخطأ الذي وقع فيه الاخرون

لماذا لم تعلنوا رفضكم للتوجيه ..؟!

الذي يُمارسه الاخرون

– اخص عليهم –

ام هي صدفه ان شباب الاخوان – الغالبيه العظمى منهم – قاموا بالتوجيه في وقت واحد وامتنعوا نسبيا عنه بعد اعتذارك ايضا في آن واحد

سيدي المرشد ان كنت قد اعتذرت – وانا فرحت كثيرا باعتذاركم – في البدايه

فانني الآن لا اصدقه .., للاسف لا اصدقه

والسبب ..,

ان شباب الاخوان وبرغم اعتذاركم ما زالوا يدافعون بل هم مستميتيين في الدفاع عن

الخطـأ الاول .., بالاتجاه مبكرا الى الشورى في ما – بينكم – لا بين جميع القوى الوطنيه لنصره الثوره

والخطـأ الثاني .., وهو التوجيه على اعتبار انه تعبيرا عن الرأي

ملحوظه : خليتوا رقبتى قد السمسمه قدام الناس اللي كنت بدافع عنكم قدامهم

كنت انتظر بعد ان انتهى لفظ " المحظوره " ان ينتشر شباب الاخوان معنا لتوعيه الناس .., حتى وان خالفونا الرأي .., كنت انتظر ان يدافعوا عن حريه الرأى ويقولوا لاامه الجوامع معنا ..., - عيب يا شيخ متوجهش الناس – كنت انتظر الكثير وكان حسن ظني بكم افضل بكثير

في الانتخابات السابقه اعطيت مرشحيكم صوتى .., ولكني في الانتخابات القادمه سأفكر الف مره قبل ان افعل ذلك

لننحي كل هذا جانبا .., ولتجيبني على سؤال واحد وحيييد .., اخذا في الاعتبار اننا نطمح لقانون يجبر الرئيس ان يستقيل من الحزب الذي يمثله ليكون لكل المصريين

اذا شاء القدر و حكمتم مصر او كنتم جزءا من الحكم

هل سيستمر مبدأ الشورى – فيما بينكم – ام سيكون مبدأ شورى بين جميع القوى الوطنيه ..؟


Friday, February 11, 2011

11-2-2011 تاريخ جديد



لاولادي
فقط علشان اسجل الحدث

11-2-2011
حوالي الساعه 6

ثورتنا .., ثوره شباب 25 يناير
اسقطت النظاام
وعلى رأسه مباارك

والحكااوي هتيجى بعدين

Monday, February 07, 2011

شهود عيان .., التحرير من القاهره



واهو صديق جديد يتوجه الى التحرير .., وينقل لي الصوره .., ويحملنى امانه ان اعطي الناس اللي هناك حقها

واشارك في التصدي للحمله الاعلاميه " شديده الهبل " التى لا اعرف لها مبررات ..,

الصديق له انتماء نعم اجنده اخواني .., اقسم لي انه هناك علشان هو بس عايز يبقا هناك

ويكون جزء من شباب حرر مصر ..,حين سألته اقنعت والدتك ازاى

علشان اتعلم استراتيجيات جديده – يمكن تنفع عندى – قالى انا قولتلها انى قررت اعمل ده ..,

وردت عليا وقالتلى اخلص النيه علشان لو فقدتك تكون شهيد .., مع العلم ان الوالده على عكس ابنها

ملهاش اجندات ولا حتى اخوانيه .., قال لي ان الناس نقلت هناك حياه كامله واحد بيحلق للناس

, وواحد بيبيع كروت شحن .., واحد بيبيع عسليه وكاتب عليها كنتاكي بنص جنيه يا بلاش ..,

وكذلك بائع الكشري كتب على العلبه كنتاكى بـ 3 جنيه ..,الناس وهي بتنظف علشان اول مره

يحسوا ان البلد بلادهم بجد وان هما محافظوش عليها محدش هيحافظ

لجان حمايه ., .مستشفى ميدانى في اكثر من مكان ..,مشاهير يهتفون ولم تلتقطهم الكميرات بعد

,ركن للادباء والشعراء تخرج منه افتكاسات التظاهر ..,واللافتات اللي قاليه روح المصريين اوى ..,

روح المصريين اللي رجعت تانى ..,اجانب بيصوروهم وكأنهم مزار سياحيه

كل من حدثنى هاتفيا من هناك ..,من يوم 25 وحتى اليوم 7-2

ومع اختلافهم بحديث كان صديق 25 -باجنده- برادعيه ..,و صديق جمعه الغضب بلا اجندات و صديقه امس بلا اجندات

وصديق اليوم وقريبه -باجنده -اخواني! الكل على اختلافهم

حدثنى عن دفء وامان و وحده

الكل حدثنى عن طاقه روحانيه تحيط بالمكان وواثقين انها باقيه في الميدان

حدثنى عن ملحمه ذابت فيها كل الطوائف .., واختفت فيها الـ " أنا " الكل

حدثنى عن انه – كل الاخوان- اللي اعرفهم كانوا دايبين وسط الناس مع الفرق انهم بيكونوا منظمين اذا احتاج الامر

الكل حدثني عن انه شاف المسيحي مع المسلم مع الانتمائات السياسيه المختلفه دايبين في بعض ومتعرفش تفرقهم

حدثونى عن اُسر انتصرت على كل ما يسمى بخوف .., وانتصرت على كل ما هو – عقيم – وذهبت الى هناك بزوجاتهم واطفالهم

الكل

الكل حدثني عن مصر حلمنا بها جميعا .., صوره التحرير الآن هي مصر جديده تولد وواجبنا ننقل الصوره علشان تنتشر

وتبقا مصر كلها كده .., وترجع لسابق عهدها جميله وتستوعب كل اختلاف

الكل

حدثني عن احساس بالسعاده .., وملأني حديثهم بالطاقه والنور والتفاؤل ..,والكل اقسم لي ان الناس دي بالجو ده مستحيل تتحرك من هناك .., وعروفوا ازاي ينتصروا على سياسه النفس الطويل بروح مصريه كانت وحشانا اووى


انا مدينه لكم بكل اصلاح يتطور في مصر الآن .., مدينه لصمودكم

فصمودكم هو الضمان الوحيد على ان الحكومه ستصدق القول

لا لانها صادقه وانما علشان انتوا فوووق دمااغهم

ادعوا من قلبي ان يجعلنى جزء من الحدث وان اصنع بيدي تاريخ

وان اكون قريبا وسط التحرير .., لاكون انا ايضا شاهد عيان

----------

اصدقائي شهود العيان

دونوا ما شاهدتوه للتاريخ

Sunday, February 06, 2011

ثمن الوطن



عارفين انتم ايه ..؟
انتم حريه ,اصرار ,صدق ,اخلاص. و وطن
دمكم مراحش هدر .., مصر جاايه .., قويه ونظيفه وقادره
تمااام زي ما حلمتوا بيها
ياااااااااااااااااااارب .., انا مدينه ليهم
...اجعل متواهم الجنه ياارب
----
الشهيد قبل ما يموت قال لصاحبه .., هما معقول هيضربوا علينا نار ..؟
واما ضربوا .., جري بيه على المستشفى الميدانى .., بصله في عينه وهو بيموت وقاله
هو احنا صح ..؟؟
عين صاحبه اتملت دموع وقاله .., ايوه صح

ايووووه صح .., وعهد عليا دمك ابدا مش هيروح هدر