ممم..
سنـه تدوين
قبلها بجد مش عارفه كنـت عايشه ازاى
ازاى عايشه من غير ما اسجل لحظاتي
ازاى عايشه من غير مـا اكتب كُل صراع بيدور في دماغى
ازاى عايشه من غير .. كراسه وقلم .. على مخدتى ..
مـعقول كان في حياتى وقت مسجلتوش لاولادي
معقول كان في حياتى وقت مكنتش بهرب فيه للقلم من سجن عقلي لافكاري
لانـي عارفه ان في كتـير من اصداقائي من غير المدونين بيتابعوا هنا
بجد من قلبي وعقلي نفسي اوقولكم
دونوا
دونـوا .. وسيبوا ذكريات لاولادكم
سيبولهم افكاركم
عرفوهم مراحل تطور عـقولكم
..
دونـوا .. خرجوا افكـاركم من بين قطبان سجن عقولكم
افتحولها البـاب و خلوها تشوف النور ... خلوها تقول انا هنا
وعندي كتـير
و لما تدونوها .. ارجعوا كل فتره واقرأوها .. وصدقونى حتتعلموا
حـتتعلموا كتير اوى عن نفسكم ...
.
.
دونـوا وحتسيبوا في الدُنيـا اثر مكتوب .. و اثر محفور في قلوب النـاس الي قرأت افكاركم
مشاعركم و احاسيسكم
.
.
دونـوا .. بصدق ومن قلوبكم .. خرجوا افكـاركم
..
محدش يقول انا عمري ما مسكت قلم
قبل المدونه دي مـكنـتش ايدي تعرف للقلم طريق
دلوقتى بقيت اكتب في كل حته .. كراسه ,قصاقيص ورق ,تكست ,وحتى مسدجات في درافت الموبايل
مش مهم الصياغه اواللغه على قد ما الافكار و الاحساس مُهمين
.
.
دونوا.. لان الانسان من غير تدوين على الورق و في النفوس
انـسان عـاش من غير تــاريخ
..
و لاصدقائي المدونين الي بيتابعوني وبتابعهم
انا سـعيده من قلبي .. اني بنتمى لعالمكم .. لاُسرتكم
رغم اني لسـه بعتبر نفسي دخيله عليه
لـكن
اثرتم فيا .. و كـتير منكم خلانى احس وافكـر
فاكره لكم كلمات بحرفها .. فاكره لكم افـكار عندي اتغيرت
وفاكـره لكم ضحكه .. واحساس
وفاـكره لكم كـل اثر
افـضلوا دونوا واملوا الدُنيـا افكار .. احساس .. وتجارب
واحنـا نقرا نحس .. ونفكر
وحتى لو اختلفنا
من اختلافنا نتعلم
شكـرا يا كـل من تركتم في نفسي اثر
شـكرا يا كُل حد قدملي نصيحه او دعـوه من قلبه
في وقت فرح او ضيق
شكـرا لانكم شاركتونى افكارى
وسمحتولى اشاكركم افكاركم ..احاسيسكم
تجاربكم وذكرياتكم
.
.
وشـكرا يا رب .. لانك دلتني على طريق التدوين
شكــرا لانك خلقتني
وخلقت القلـم
.
.
