ذكريــات الجدران

الكلمه دي بحسها دايما لما بكون في الحسين او خان الخليلي
نفسي اووى اروح مصر القديمه

بشوارعها وحواريها وتفاصيل النقووش في جوامعها
علشان كده لما بشوفها بحس بيها

ببصلها اووى وبحبها اووى

وبلمسها

بسمعها وهى بتحكيلى

وعيوني بتلمع اووى

بفتكر قصص التاريخ الى كنت بذاكرها زمااان

بشوف الناس بتاعت زماان وهى ماشيه في الشوارع

وبياع العرق سوس ماشي يخبط وعامل دوشه

وواحده ست لابسه برقع وملايه سوده

والارض مرسومه بالحجر وضل على الشوارع

ومشرابيه وواحده بتطل منها على حبيبها الى ماشي

لابس طربوش وهو بيسرق النظر ليها وهى مكسوفه

..وواحد معلم قاعد على القهوه وماسك منشه

و جنود السلطان ييجوا ويمشوا في الشارع

ومنادى بيقول الاخبار الصبح للناس وهو ماشي بحماره وطبلته الصغننه

والخاين يقطعوا راسه ...ويعلقوه على باب زويله

سعات بستغرب اووى ان بلدنا كان ليها ابواب بتتقفل وتتفتح

يعنى اسافر على حصان ولا جمل واخبط على باب المدينه
!!والاقي واحد من جنود السلطان بيفتح ويسألنى

اسمك وسنك وعنوانك
وارد عليه واقوله انا عابر سبيل

دايما بحس انى عايزه المس الجدران واسمعا وهى بتحكيلى حكايات الزماان والحروب والغزوات

و الموالى والمماليك والعباسيين والفاطميين

وتاريخ مصر الطويل العرييض

كتير اتمنيت ان يكون عندى اله زمن

اتنقل بيها بين ثنايا التاريخ

واشوف الحكايات

بس كل لما اروح لمكان جدرانه قديمه

ادرك انى عندى جوايا في نفسي وعقلي اله زمن

بتخلينى اتخيل كل الاحداث واشم ريحتها و اسمعها واحس بيها

حتى في بورسعيد لما بمشي في الحميدى والتجارى والشوارع الضيقه

الى فيها ناس ساكنه والفرق متر واحد بين الشباك والشباك

و عماير خشب ولما امشي من هناك وتحكيلى
وانا مروحه امر على الافرنج
واشوف العماير الكبييره

والطرقه الواسعه والسللام الرخاام والبلكونات الكبيييره

والسقف العالى

واتغااااظ اووى ان الناس دي كانت عايشه في بلدنا

ومدلعين نفسهم اخر دلع

مساحات واسعه

وفيلات وديكورات و فنون

ومدارس فرنساوى خاصه للبنات وللولاد

وحاله من الرفاهيه العامه

واحنا متكبين كلنا فوق بعض في حي واحد
ضييق وزي علب الكبريت كـــل ده بتحكيهولى الجدران القديمه

وتشكيلى وتبكيلى و سعات تفرحنى معاها
وتقولى شوفتى الي حصل بكل ذكرياتها

يا ترى بيتى حيكون من الاثار

وحيكحى لحد عنى

يا ترى ساعتها لما حيحكى حيقول ايه