تاج ما قبل الحكم ...وتاج الحكم ...وتاج تأييد الشعووب

اخيرا خلصت امتحانات و بجاوب اهو التاجات المتأخره
اوى جداا خالص
اسفه جدا لزورديك ولمبرمج حر على تاخيري في الرد
على التاجات الى اتبعتتلى منكم
وهبدأ اهو
مع تاج ما قبل الحكم

هل تسعد عندما يمرر لك أحدهم تاجا؟
معنى تمرير التاج معناه ان انت على بال حد في حد مهتم انه يعرف عنك حاجه
والمعنى ده هو الي بيفرحنى

هل مقدار سعادتك أو شعورك أيا كان - عند تمرير التاج لك يختلف حسب المدون الذي يمرر لك التاج؟
هو انا لسه لغايه دلوقتى محستش بالتباين ده لان كل الى بعتولى تيجان بنفس مقدار المعزه عندى
فـ الى بيفرحنى التواصل

هل تستمتع عند إجابتك عن أسئلة التاج؟
على حسب نوع الاسئله

هل ترى للتاج أهمية حقيقية ؟
اهميته في التواصل
بـأسئله مباشره واجابات واضحه عن حجات مفكرتش تكتب عنها في بوستاتك

بس مشكله التاج الوحيده بالنسبه ليه هى التقيد بوقت معين

ده بس الى مش بحبه فيها


هل فكرت في عمل تاج خاص لك من قبل؟
فكرت اعمل لكل مدون مجموعه من الاسئله الخاصه بيه عن مدونته وافكاره والحجات الى مش بفهمها وبحب اسأل عنها
بس معرفش اذا كنت حلاقى الوقت لده ولا لأ

هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط؟
على حسب بردوا لمدون الى عنده التاج

بس غالبا بقرأها

عندما ترد على التاج ما الذي تراعيه أكثر؟

ان يكون مزاجى حلو علشان مطلعش قرفي في التاج

:)))

إلى من تحرص على تمرير التاج؟

هو انا في الحقيقه ممررتش لتاج لحد بعينه قبل كده

بس دايما بقول الى من اصحابي يحب يجاوب التاج يجاوبه علشان مااقيدش حد

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

هو انا ممررتش لحد قبل كده

بس لو حصل اكيد حقرأ

وبما انى حكون بسأل في حجات عيزه ليها توضيح يبقا وارد جداا يغير في ادراكى ليهم

هل تلتزم حرفيا بأسئلة التاج ؟

انا بجاوب على كل سؤال بصراحه

ما هي نوعية التاجات التي تفضلها ؟

التاجات الى فيها فكره

ندخل على تاج الحكم

الى حكمت بيه العالم

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها

كل الناس الى قرات اجابتهم للتاج ده قالوا القراءه

انا في الحقيقه لحداثه هوايه القراءه عندى عمر ده ما حصل

بس بيحصل وانا قاعده على الكمبيوتر

وكان بيحصل وانا بذاكر الكمياء لانى كنت بحبها جدا

وكان بيحصل وانا بعزف ... العزف ده كان عشق بالنسبه ليا

وانا بلون كمان

عامه انا لما بعمل ى حاجه بحبها بوصل فيها لدرجه الاندماج والتركيز ده

الى جاى بقا ده تاج تأييد الشعوب لحكمى ... عقبال الى في بالى

أحب شخص لقلبك في الدنيا؟

ماما واخويا واصحابي ومجتمع اصحابي الى كانوا على النت وبقوا اصحاب على الوقع

انسان مستعد تضحي بحياتك – ركز فى كلمة حياتك – عشانه؟

انا فكرت في السؤال ده كتيير

والتضحيه بالحياه ليها معنيين انك تموت فعلا

و انك تموت وانت حي

بالنسبه للاولى فـ اعتقد انها بتكون وليده اللحظه يعنى لو في حد في خطر انت ممكن تضحى بنفسك وتنقذه بشكل شعورى

بحت

اما بالنسبه لانك تضحى بيك وانت عايش

يعنى متحققش طموحك مثلا علشان تساعد غيرك يحققه

فـ اعتقد ان لو ده حصل مش حكون بضحى بحياتى

ده ممكن يكون هى دى حياتى اصلا وربنا جعل دورى في الحياه انى كون جنب الحد ده لغايه ما ينجح

يا رب يكون المعنى وصل

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

ده اييييييييه التفصيل ده

مش حقول انى عمرى ما كرهت حد لا كرهت

كرهت اى انسان ظااااالم سواء مصري عربي مسلم اسرائيلى امركيى اى حاجه

كرهت اى انسان بيتعامل بسوء مع زوجته

كرهت البنى ادم المنافق

و و و

ما هو اسم اجمل كتاب كتبه بشر قراته ومحتفظ به حتي الان؟

مفيش ... لما ابقا اقرأ كتير اكيد حيكون فيه

اسم كتاب كتبه بشر برضة- انت متعلق بيه وبتقرأه كل فترة؟

نفس الاجابه

اهم جهاز منزلى انت متعلق بيه او بتستخدمه كتير؟

كمبيوتر من غير كلام

مكان تحس بالراحة عندما تدخله؟

مكان فيه صحاب لوحدنا ويااااااااااا سلاااااااااااااام

لو كان البحر

بعشقه ... عشق عشق

شىء تحس بالراحة النفسية عندما تنظر اليه؟

البحر وهو هاادى

لون مراعى خضراااء ممتده

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

شارع مدرستى

بيحصلى حجات غريبه وانا ماشيه فيه

اجمل مدينة زرتها داخل مصر ؟

الاسكندريه

أجمل مكان طبيعي رأيته داخل مصر ؟

البحر الى جوه الجبل في مطروح

اسمه عجيبه تقريبا

شخصية كارتونية بتحبه

كتيييييييييييييير اوووى

بس انا بحب جوفي او بندق جدااا بحبه اووى وبيضحكنى

وكنت بحب ديلفي و رولى

ومن الكارتون الحديث كونان بحبه حب بجنوون الشخصيه نفسها

ملامحها وكلامها وهزارها و عقلها

وكله كله

مش حخلص لو حفضل اقول لان احساسي بالكرتون مختلف بعيش فيه وبحس وكأنه واقع وحقيقه وكتير اتمنيت اكون بطله فيه

نوع هاتفك المحمول؟

نوكيا

سرعة بروسيسور جهازك؟

مليش اي صله بالحجات دى في الجهاز انا مجرد مستخدم ونوفا هو بقا الى يعرف

حجم ذاكرة –هارد- جهازك؟

ثوانى كده اسأل نوفا

واجاوب في التعليق

المساحة التى تشغلها المواد الاسلامية على جهازك؟

حسأل بردو

أهم هدف انت واضعه لحياتك الآن؟

الان يعنى دلوقتى اخلص الكليه وفي نفس الوقت اعد نفسي في مجال التنميه البشريه

والعمل الاجتماعى

مواصفات فتى الأحلام بالنسبة لك؟

امممممممم في

تدوينه ليا اسمها اندهاش

لو في واحد تفكيره ممكن يقوده بانه يعمل الى في التدوينه دي

حيكون هو

بس الشرط الاساااسي جداا جدااا هو الذكاء وانه ينتصر على دماغى في مباراه متكافئه الفرص

صف ما يأتى:شعورك لما بتسمع كلمة مصر ؟

الى عايز يعرف يقولهالى ويبص على وشى علشان مش بعرف

اقول

شعورك لما بتسمع كلام عن اليهود؟

الى بيضايقنى

الاسرائيلى لان اعتقادى ان مش كل يهودى شرير

المشكله في الصهاينه

ربنا ينتقم منهم

شعورك لما بتشوف ظابط شرطة؟

بحس بقرف رغم انى عارفه نه مش شرط يكون احساس عادل بس ده الى بحس بيه

شعورك لما بتشوف الكناس العجوز فى الطريق؟

بحترمه جداااا وبيصعب علياااا جداااا

بجد بجد بحترمه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

مش عارفه شكله بيخلينى احترمه

انما مش شرط ابدا لان في كده في احتكاك شبه مبشر بينهم بيكونوا مش كويسين والعكس بالعكس

احساس يراودك فى اشارة مرور مغلقة بسبب مسئول كبير؟

بتغاظ

ااااااااااه انا تعبت اووووووووووى

مش حمرر لحد هه