في الحقيقه انا كنت جايه هنا اكتب حاجه تانيه خالص
دخلت عند زحل الفلكى وقرأت الموضوع بتاع انواع البنات
استفذنى النوع الاخير جداا وخصوصا انى قابلت منه كتير
فلقيتنى عايزه اكتب عن فوكيراتى عن الموضوع ده
اهو
--
حسبه بسيطه ومنطقيه بسيطه
على رأى روزاليا الف باء تفكير
الانسان بياكل علشاااااان اييييييه..؟
علشان يعيش
برافو
مش بيعيش علشان ايييييه..؟
مش بيعيش علشان ياكل
براااافو
ليه بقا وعلشان ايه بقا بردو
في مجتمعنا البنت بتقضى حياتها كلها في المطبخ ؟؟
!!
! من والبنت صغننه يلاااا ادخلى المطبخ مع ماما
كنت وانا صغيره بسأل ليه دايما حاجتين
ادخل(ى) ومع ماما
ليه مفيش مره ادخل ومفيش مره مع بابا
المهم ولما سألت عن السبب قالوا علشان حاجتين
الحاجه الاولى
علشان نساعد ماما وده على عينى وعلى راسي مع انى مش بنتها لوحدى يعنى بس اهو كله بثوابه
والحاجه التانيه ...علشاااااااان تتعلمى الطبيخ
من وانتى في ابتدائي لغايه الكليه ولو حظك معرفش حلو ولا وحش ومتجوزتيش على طووول تكملى علام بقا لحد م يجيلك العدل
ليه دايما ده الشائع والكتير في المجتمع
ليه مفيش في الاجازه مثلا نقول تعالى اقرأى الكتاب ده وثقفى نفسك علشان نفسك وعلشان تربي ولادك صح
اعترف انى مش من اسره سي السيد يعنى انما ده موجود وشوفته بدرجات مختلفه في الوسط المحيط بيا
عوده علشان محدش يفهم الموضوع غلط
الطبيخ مهاره مهمه جداااا جداااا ضروري الواحد يتعلمها
على الاقل علشان يقدر يعتمد على نفسه
بعيدا عن فكره الولد والبنت
لكن مادام الانسان بياكل علشان يعيش
مش بيعيش علشان ياكل
يبقا حرام يقضى عمره كله نصه بيتعلم ازاى يعمل الاكل والنص التانى بيجهز الاكل
ولو ده اساس الحياه كان ربنا خلق جنس حواء ده
كائن مطبخى ملوش عقل زي ما سخر الحيوانات
لخدمه البشر
لخدمه البشر
اكيد ربنا له حكمه انه خلق البنت بمشاعر وعقل يحترم
وانه بيحاسبها وبتدخل يا الجنه يا اعوذ بالله النار
وانه بيحاسبها وبتدخل يا الجنه يا اعوذ بالله النار
ونقطه تانيه بردو علشان محدش يسيب اساس الموضوع زي م بيحصلى دايما
لما بتناقش مع حد في الموضوع ده
ويقولى
الجمله الاشهر ""يعنى انتى عااايزه الراجل يطبخ"" ارجع وااقول
لما بتناقش مع حد في الموضوع ده
ويقولى
الجمله الاشهر ""يعنى انتى عااايزه الراجل يطبخ"" ارجع وااقول
ده له علاقه بمرحله ...
التربيه بشكل اساسي
بمعنى انا لما يكون لى اسره وبيت وزوج
موضوع الطبيخ ده حيكون على حسب ظروف حياتنا وباتفاقنا احنا الاتنين
"علشان نعيش يعنى"
ولو كانت ظروف حياتنا بتقولى
انى لازم اطبخ بشكل اساسي (بس هو يقدر ويساعدنى بردو) عادى جداا لكن ميكونش عندنا فكره ان البنت مكانها المطبخ
والافكار العجيبه دى
اعلن استعدادى الكامل لتعلم الطبيخ ولكن من باب المهارات المكتسبه الى بتضيف ليا ولثقافتى ولحياتى
وقدرتى على اعتمادى على نفسي ورعايه اولادى في المستقبل
مش من باب
انى بنت وانى كائن مطبخى بالفطره
----------
على فكره كل مره بعرض فيها افكارى دى على الناس الكبار
بندم انى عرضتها للفهم الغلط ليها معرفش من طريقه عرضى ولا من ثقافه الجيل ده
لكن اتمنى مندمش المره دي
بمعنى انا لما يكون لى اسره وبيت وزوج
موضوع الطبيخ ده حيكون على حسب ظروف حياتنا وباتفاقنا احنا الاتنين
"علشان نعيش يعنى"
ولو كانت ظروف حياتنا بتقولى
انى لازم اطبخ بشكل اساسي (بس هو يقدر ويساعدنى بردو) عادى جداا لكن ميكونش عندنا فكره ان البنت مكانها المطبخ
والافكار العجيبه دى
اعلن استعدادى الكامل لتعلم الطبيخ ولكن من باب المهارات المكتسبه الى بتضيف ليا ولثقافتى ولحياتى
وقدرتى على اعتمادى على نفسي ورعايه اولادى في المستقبل
مش من باب
انى بنت وانى كائن مطبخى بالفطره
----------
على فكره كل مره بعرض فيها افكارى دى على الناس الكبار
بندم انى عرضتها للفهم الغلط ليها معرفش من طريقه عرضى ولا من ثقافه الجيل ده
لكن اتمنى مندمش المره دي
19 comments:
تصفيق حاااااااااااااااااااااااااد
أحييك على البوست جدا جدااااااااااا
موضوع فى الجون، ومتفقة معاك جدا جدا، المشكلة مش فى ان احنا نتعلم الطبيخ ونطبخ المشكلة ان هما عاوزنا نعمل ده علشان احنا بنات بس.. يعنى علشان النوع
ومش بس ادخلى مع ماما المطبخ وما فيش ادخل ومع بابا ، كمان حضرى لاخوك وما فيش حضر لاختك (مع انه الكبير يعنى) بس ازاى وليه يحضر ، هو راجل وانت بنت ، قومى هاتى ميه ما فيش قوم هات ميه، قومى اغسلى الاطباق ما فيش قوم اغسل الاطباق..ياااااااااااااااااه
وحاجات تانية كتيييييييييييييييييييير، لو اقعدت اقول كل حاجة مش حنخلص، وده مش بالنسبالى انا ده بالنسبة لاى بيت ولاى بنت الكلام ده بيحصل
بحيييك جدا على الموضوع، والموضوع ده يطول شرحه والكلام فيه ما لهوش اخر، لان انا وانت بنتكلم فى ثقافة مجتمع ، ثقافة عمرها سنين
أطلق سراح أفكارى فهى حرة مسئولة لا تطيق القيود
الحر المسئول ليس عليه قيود
مدونتك رائعة
ههههههههه بذمتك يا ميوي مش عارفة ليه بتندمي لما بتعرضي أفكارك على الناس الكبيرة ... طبعا علشان انتي عايزة تسيبي مكانك ككائن مطبخي وتتحولي لكائن فضائي..
هههههه معاكي في كل كلمة قولتيها بس اصبري لما نشوف تعليقات الجنس الخشن
عجبتني أوي كائن مطبخي بالفطرة دي .. هههه و برده عجبني جداً .. تعليم فن الطبخ من باب اكتساب مهارة .. لأنها حقيقة .. هي مجرد تصحيح مسار عادة و عرف عجيب بين الناس و توارثه الأجيال .. و إنتي طبقتي إللي كنت بقوله في محاضرات التغيير .. إني لازم أوقف عندي حاجات كتير جاتلي و انا مش مقتنعة بيها .. ولازم أنقلها تاني بالشكل السليم .. و إنتي عملتي كده فعلاً ..
فا بجد 10/10
بصى يا قمر
أنا بتفق معاكى جدا فى أن البنت مش كائن مطبخى
بس للأسف ان الفكره دى متوجدتش من فراغ فى بنات فعلا المطبخ هو كل حياتهم ومش بيعترضو ولا بيفكرو يغيرو الحياه دى ده حتى مش بيتكلمو غير عن المطبخ والطبيخ ودى الثقافه الوحيده اللى بيفهو فيها
أنا قابلت كتير جدا من النوعيه دى
وده طبعا من وجه نظر كثيرين الطبيعى علشان كده بيعتبرو النوعيه دى هى الصح
وأن غير كده هما الغلط
المشكله فى البنت وطريقه تفكيرها مش فى الناس بتبص للموضوع ده ازاى
يعنى أنا ممكن اثبت انى طباخه ممتازه وفى نفس الوقت عقل مثقف واعى وعضو فعال فى مجتمعى
لكن لو الواحده حصرت نفسها فى كادر المطبخ وبس يبقى تستحق النظره اللى الناس دى بتبصهلها
أنا مثلا والدتى متوفيه ,انا اللى بطبخ فى البيت وكنت بدخل مع ماما المطبخ قبل كده بس مش معنى كده إنى كائن مطبخى
أنا بطبخ علشان ناكل علشان نعيش
وفى نفس الوقت ليا حياتى الاجتماعيه التانيه المنفصله تماما عن المطبخ وليا عقلى وفكرى وثقافتى المختلفه تمام عن فكر المطبخ
الفكره زى ما قلتلك فى البنت
هى اللى بتحدد موقعها من المجتمع ونظرته لها
فكره التدوينه تستحق التصفيق الحاد
تحياتى
بوست مميز يستحق الاشاده
ولكن مفهوم الامومه اوسع واشمل ولكنه سرد مميز
احيكى يا مى بجد
بوست رائع فعلا
وكان يجب نقاشه
عجبنى اوى رفضك باننا بنحسب على اننا كائن مطبخى
بجد انطباع غريب تناقلته الاجيال و اتعرف على كدا
من دون تفسيره او تغييره
شكرا ليكى ويا ريت الكل يعرف ويصحح وجهه النظر دى
شكرا ليكى
:)
الكلام ده صح 100\100
وان بردو بقول كده ومش عاجب حد خالص
وكل ما اكلم حد فى الموضوع ده يقولى انت مش طبيعيه
يعنى ايه مش عايزه تطبخى امال هتجوعى الراجل اللى راجع من الشغل تعبان
يعنى انا اللى هاكون بالعب فى الجنينه
بس فعلا حاجه تضايق اشمعنا البنت هى اللى تطبخ...ويرجعو يقولوا ان احسن شيف بيكون راجل
مانتوا بتعرفوا تطبخوا اهو
لا واللى يغيظ ان الننوس اللى يجي يتقدم قاال ايه ل"دا انا بحب الكل جدا ولازم تتعلمى كل الاكل اللى بحبه فى فتره الخطوبه"لا يا بابا كل فى بيتكوا احسن
ولما تقوليله طب ابقى ساعدنى مهى الحياه تعاون يبصلى كده كانى مجنونه ويقولى "ازاى يعنى انا اللى هاعمل الاكل ولا ايه؟" ناس تنرفز
كفايه شكلى كده كتبت كتيير
اصلك جيت على الجرح
بس والله برافو عليكى
ايه يا بنات مالكم كده
كل واحد فى الدنيا له شغله
والفطره ان الست للبيت
والرجل للعمل
بس قبل ما تقوموا عليا..انتوا عندكوا حق برده....لان البنت دلوقتى بتشتغل زى الرجل ولازم زى ما بيتعاونوا بره يتعاونوا جوه كمان
محدش يزعل
بحبك يا مصر:
ودورنا اننا نغير الثقافه دي مادام اقتنعنا بالفكره ومنخفش من التغير طالما هو ناتج عن تفكير واقتناع وعقل
رسالتى كانت للبنات الى حيكونوا امهات وربات بيوت
مدام مش عاجبنا الوضع اهو في ادينا نغيره
طب ازاااى
بـ 3 حجات
- ننشر فكرتنا في الى حوالينا
- و نربي اولادنا على الفكره دي ودي اهم الخطوات
- نفهم الى حنرتبط بيهم الفكره ونحاول نقنعهم بمفهيمنا
الى ابدا مفيهاش تخلى عن الانوثه او حقيقه الامور
-- اصبتى الحقيقه ولكن بتعديل بسيط
الحر المسئول لا يجب ان يكون عليها قيود
تحياتى
-----------------------
تسنيم :
حلوه اوووى تتحولى لكائن فضائي دي
اهى هيه تعليقات الجنس الخشن دى
انا حتى متقبله ان حد يعارضنى بس بمنطق ونتناقش ونشوف حنوصل لايه
يا مسهل
---------------------
روزااا: وانا بكتب كائن مطبخى بالفطره افتكرتك
:))
عارفه يا روزا من يوم كورس التغيير
وازداد ايمانى بجمله مهمه
بقيت اطبقها بشكل كبير
هى
"ابدأ بنفسك طالما اقتنعت"
تحياتى
----------------------
ريمو : انا كمان قابلت من النوعيه دى كتير
لما بطلب منهم نتكلم في اى حاجه تانيه
بيتعاملوا وكان البنت اتخلقت للطبخ وشغل البيت وفقط
مع ان دى مش حقيقه
انا اختلف معاكى في جزء صغنن
وهى ان المشكله مشتركه ما
بين اقتناع البنت زات نفسها بقدراتها وما بين قناعات المجتمع
يمكن النسبه الاكبر على البنت
الصوره الى بتتكلمى عنها والى ضربتى نفسك بيها مثل هى الصوره الاافضل بالنسبه لى
ان حتى لو الست قعدت في البيت ومشتغلتش
ممكن جداا يكون ليها نشاط ونجاح وثقافه وده ميتعارضش ابدا مع مراعتها لبيتها
بس السؤال هى عايزه ده ولا لأ
تحياتى لتعليقك الثري
محمد مفيد : اولا تحياتى لانك اول مذكر يدخل البوست ده
والى انت كتبته ده تمااااماااا متفق مع ما سطرته
لان البوست دعوه لاننا نفهم ان الامومه مش محصوره في الطبخ وشغل البيت
الامومه اعمق من كده بكتيير
وده كان احد الدوافع لافكارى دى ... في حد من زمايلى كان بيتكلم عن مامته كده ومقتنع تماما ان ده دورها في الحياه انها تعمله الاكل
طبعا هو العيب مش عليه العيب على مامته
تحياتى .. لرأيك المحترم
-------------------------------
رووودى:
زي ما اتعلمنا طالما اتعلمنا نسأل على كل حاجه ليه ونعرف اصلها لو مقتنعنش بيه بادينا نغيره
وزي ما قولت
ابدأ بنفسك مدام مقتنع
تحياتى
-----------------------
بندقه : اهلا بزيارتك الاولى او بتعليقك الاول
انا عايزه اتناقش معاكى في نقطه
الى كتبته في البوست رفض للفكره اكتر منها للفعل
بمعنى ان انا مش مش عايزه اطبخ
ولا رافضه الطبخ في كونه طبخ
انا الى رفضاه ان حد يتعامل معايا على انى خلقت لكده
ولان ده في معتقدى مش حقيقي وضد الي ربنا خلقنا عليه زي ما وضحت في البوست قررت اغير الفكره دي
يعنى اقصد انها مش حرب وانتى اكيييد فاهمه ده كويس ...وزي ما كتبت في البوست اننا حنتفق حنعمل ايه على حسب احتياجتنا وباتفقنا وبالتفاهم
تحياتى
---------------------
صباح الخير : اول ما قرأت صباح الخير قولت صبااح النور على البنور
:))))
بالنسبه للشغل البنت ... بالاضافه للى كتبتيه ... حتى لو الست كانت ربه منزل بردوو ممكن تعمل حجات كتير جداا ومرفوض تماما معاملتها على انها كائن مطبخى علشان مش بتشتغل
ولو بتشتغل يبقا نتى ارسيتى مبدأ محترم
وهو في جمله بسيطه
زي ما بيتعاونوا بره يتعاونوا جوه
لانهم زوجين مش اعداء بيعدوا على بعض
والى يقدر يعمل حاجه يعملها
تحياتى
good job..
7elwa 7ettet 2o3len este3dady el kamel l ta3allom el tabee5 de.. betfakkarny b mawqef syasy mash hoor lel sadat lamma 2al 2o3len e7tegagy el rasmy 3la damm el 2ods.
ANYWAY.. shoofy ya o5ty bema ennena banat zayy ba3deena w bnesma3 nafs el kalam 3an el matba5 2o2akedlek korhy el shadeed lel matba5 wel tabee5 w 3'aseel el atba2 wa LAKEN.. honaka wag hon a5ar lel 3omla...
leh betbossy ennek lama tetbo5y bte3mely ash3'al sha22a.. momken tkoony btenqezy el bet men ragel gahel bel tab5 bybahdel el denya w maby3rafsh yetsarraf??
howa ye3mel 7aga by3rafha wenty te3mely 7aga enty 3arfaha w kollo shayel ba3do zayy el malek wel ketaba keda.. 3omrekeesh shofty coinaya fadya men 2oddam bas??
mmbeiram
كلامك صحيح تماما
لكن المشكلة ان الافكار دي لما تملا دماغ بعض البنات بيتخلوا عن الموضوع تماما
و انا مالي اشمعنا هم ميطبخوش و مترضاش تعمل اي حاجة و لا حتى لنفسها
انما الفهم الصحيح مطلوب
اول زيارة للمدونة
ربنا يباركلك و يثبتك
حلوة كائن مطبخي دي
إزيك الأول بما إنها الزيارة الأولى ليا
منطقي إنك تندمي لما تعرضي أفكارك على حد كبير بل في مجتمع زي مجتمعنا ده لما يحصل كده تتأكدي إنك بتفكري صح
امممممممممممم
أنا معاكي في إنه ما يكونش تعلم الطبخ بالإكراه و لكن مهم جدا إن الست تكون بتعرف تطبخ ده موروث عندنا و شئ مهم بجد
البوست جمييييييييل جدا احييكى عليه
الطريقة الاكثر نجاحا للوصول الى قلب الرجل الشرقى هى معدته ، انا من صغرى بفكر و بقول هو ربنا قال فى كتابه ان الشغل فى البيت و الطبيخ فرض على المرأة ؟
طيب ليه مش بنبص لسيدنا محمد صلى الله عليه وسلم لما كان بيساعد زوجاته فى البيت ؟ ليه الراجل سايب مسئولية البيت كلها على المرأة و اتحول هو لمجرد ماكينة فلوس ، لا و كمان الست تشتغل عشان تساعده
مش بتشوفوا فى الافلام و المسلسلات الاجنبية و الرجالة و هم بيطبخوا و يتفننوا فى الاكل ؟
مش بتشوفوهم و هما بيعلموا اولادهم و بناتهم ازاى يعملوا لنفسهم الاكل و يتصرفوا عشان الظروف؟
الكلام فى الموضوع كبير قوى و مالوش اخر بس دى للاسف ثقافة شعب
قبل البوست وقبل كل حاجة .. ربنا يوفقك ان شاء الله ويوفقك فى امتحاناتك وينجحك .. وبلاش تدوين اليومين دول .. وركزى فى المذاكرة .. شدى حيلك
ربنا ينجح كل اللى بيمتحن
anonymous:بلغ بيجن احتجاجى الرسمى على ضم القدس
:D
ندخل في الجد ... الطبخ وشغل البيت اعتراضى عليه مش انه اشغال شاقه و ما شابه مش في كيانه هو... الى معترضه عليه هو الفكره مش الفعل ذات نفسه
والفكره الى هى تعامل الناس مع البنت على ان ده مكانها الطبيعي
او انها كائن مطبخى بالفطره
ومعاكى حق بان كل عمله ليها وجهيين واحنا لوجهين في تلاحم جميل
و مينفعش يكون الحياه بانتى وانا
تحياتى
----------------------
علاء: متفقه معاك جداا
ان بنات كتير بيبصوا للموضوع ده غلط وبياخدوا رد فعل غلط عليه
وانا مع الفكره الي بتقول لو مش عاجبك حاجه في حد فمفيش داعى انك تعملها
بمعنى انى انا لو شايفه خطأ في عدم تعلم الولد للطبخ فمفيش داعى انا كمان اعمل زيه ومتعلمش
يعنى رد فعلى على رفض الغلط مش انى اعمل الغلط نفسه
تحياتى
-----------------------
مادو:اهلا بزيارتك الاولى
دورنا اننا نبص في موروثاتنا دى
ونفهمها ونسأل ده ليه وعلى شان ايه
والى مش مقتنع بيه فيها اوقفه لغايه عندى واغيره وانشر فكرتى
هى دى قناعاتى وعلشان كده كتبت البوست ده هنا
تحياتى الحاره لأى فكر معارض
:)
--------------------
جيداء:احييكى بجد
لضربك المثل بالرسول عليه الصلاه والسلام
لو دى فطره الحياه مكانش الرسول وهو كان اكثر رجل مشغول في الدنيا
الصبح دعوه ودوله ووحى و و و و
وباليل عباده وتهجد
والرسول كان بيساعد زوجاته
ببساطه لان الرسول كان قوام
وده فصل من فصول قوامه الرجل على المرأه مش بالعكس
زي ما هو موروث عندنا
تحياتى
---------------------
اخف دم : شكرا على دعمك
ودلوقتى اليك الخبر السعيييييد
الامتحانات خلصت
جميل جدا التعبير عن الافكار اللى ممكن
بنات كتير بيخافوا يعبروا عنها
و اعتقد انك بالبوست ده لمستى نقطة تشعر بها كل فتاة
بس تيجوا نفكر سواء بشكل مختلف
البنت كائن مطبخى دى كلمة جت منين !!!!
مش عارف حسيتها جايه من قول برضه قديم
الطريق إلى قلب الرجل معدته
مش ممكن يكون لما العرف قال الكلمة دى زاد اهتمام المرأة بالمطبخ و بقى على كل بنت لازم تدخل المطبخ تتعلم من صغرها علشان لما تتجوز ترتاح و تكسب جوزها
اعتقد ان زى ما المقولة الاولى ظالمة للمرأة
المقولة الثانية ظالمة للرجل جدا
و نتكلم جد شخصيا لا احب تصنيف المعاملات لرجل و مرأة
ليه ميكونش المقايس هى الانسان
و متنسوش ان اشهر شيفات العالم رجال
و اشهر مصممين الازياء رجال
و لا دول حالات خاصة
اللى اقصده ان مفيش أحلى من التعاون
و ان كنت اعتقد ان كائن مطبخى دى اتغيرت لان معدش الطريق إلى قلب الرجل معدته
لا الميكاب بقى اهم و دى تفسير لظاهرة اهتمام غالبية البنات بمظهرهم بعيد عن أى الجوهر
لان اسهل طريق إلى قلب الرجل اصبح المظهر
و تعقيبا على كده و رغم اعتراضى على فكرة كائن مطبخى
بس ده لو الطريق دلوقتى و ده السبب
يبقى مفيش اجمل من المطبخ منقذ للاخلاق
شوفتى المطبخ حلو ازاى و بسببه بيجى الخير كله
ههههههه
و سلام :)
جوده :
ربنا يلطف ببنات المسلمين
من عقولهم قبل اى حاجه
Post a Comment