بتبقا بجد متعه لما تركب المعديه
و متكونش متـأخر ... وتدور على ابطأ معديه في الكنال ... بورسعيد 3... للي مش من هنا دي بجد ابطأ معديه في التـاريخ
وابطأ منها واحده بس... بورفؤاد 7 ... قديمه اووي ومش بنشوفها كتير هنا
المهم... تـركب وتنقي لنفسك مكان بيـطل على الميه على طول
وتستمتع بأبطأ رحله كناليه في التـاريخ
يستحسن انك تكون لوحدك ... وتبدأ
التــــأمل
بجد من اكتر الاوقات الي ذهنى بيكون صـافي فيها
المعديه ... صومعه التأمل والراحه النفسيه وصفـاء الذهن
والتــفكـير
يــــــــــــــاه بجد متعه ... بتتـعلق بيها اكتر يوم عن يوم
النورس ... السفن الي سعات بيكون ليها اشكال غريبه ... البحـاره العمال
الي راكبينها و ملامحهم مختلفه عننا من كـل شكل ولون ...وتفكيرك فيهم يا ترى المركب دي من اي بلد ورايحه فين ومعموله علشان نقل ايه ..؟
الاولاد الي بيتمرنوا تجديف او سباحه ... و اليخوت الي تعقد والي راكبينها...و السفن السياحيه المُبهره... النـاس في النوادي الي بتطل عالكنال
و الدولفين لو حظك حلو ...وقناديل البحر عايمه... الاوناش و انعكاس النور عليها وقت الغروب ... السمـا و الهوا المُنعش ... و النجوم في الليل ... الشيء المشترك بين كل سكان بورفؤاد
وحجات تانيه كتير بعشق تفاصيلها
المهم
في الوقت ده من السنه
طيور النـورس بتملأ الكنـال ...
طيور النـورس بتملأ الكنـال ...
وكتيـر من اهل البلد دي تملي يعملوا حسـابهم ... كل واحد وهو نازل وعارف انه حيركب المعديه يجيب معاه شويه
عيش ... ويقطعهم قطع صغننه ... ولما المعديه تمشي ... يجي جنب الميه ويرمي العيش للنوارس
يـــــــــــــــاه
وتتلم النوارس كلها و تنقض على فطـارها او غداها ... و تحس انك لو مديت ايدك حتمسكها
و تبقا خايف منها و فرحان بيها ...
خايف من قربها الشديد و تكتلها و حدتها وفرحان لان بجد شكلها يفرح ...
مشهد يستفز اي كاميرا انها تجري وتلقطه
وفي اخر مره كنت في رحلتلى الكناليه ... و لحسن الحظ كنت فيها لوحدي زي ما بحب
كـان في مجموعه نوارس.. وراجل كبير في السن بيأكلهم... والكل بيتابع المشهد وهو ما بين سعيد وخايف
ومستني يشوف حيعملوا ايه المره دي ..؟
و الراجل بالصدفه حدف العيش لفوووق.. مرماهوش في الميه على طول
بصينا كلـنا ...لقينا طـــائـر نــورس ..انطلق واخد العيش وهو طـاير في الهوا ...
قبل مينزل المـيه
كـل الي بيتابعوا المشهد ضحكوا مره واحده وهما متفاجئين
والجميل ان الـراجـل عجبته الفكره
وقال للطـائر "الله " وهو مبتسم
وبقا يمسك قطعه قطعه ... يرميها في السما و طــائــرالـنـورس
مع حركه ايده متابع... وهووب يطيير و ياكلها
و متفلتش منه واحده
بعد ما درب نفسه عليها كام مره
و انا بتأمل المشهد ... سرحت في عيون النـورس ده
يـــــــــــاه ... قد ايه مــركز .. قد ايه بيتــحدى ... قد ايه مُصـــر ...قد ايه نظـرته ذكــيه...قد ايـه واضــح ...قد ايه هو غير كل النوارس الي بتستنى الي يقع منه
في الميه ويـاكلوه ... صحيح في مجموعه نوارس عجبتهم الفكره وقلدوه
بس بجد ده كان فيه شيء مختلف ...
قـد ايه اثرت فيا عنيه العميقه الي فيها كلام ... قد ايه شحنـت قلبي بطاقه
وعقلي بـأفكار ...
كـان نفسي يكون معايا كاميرا ...علشان اسجل النظره دي
بـس اكتفيت يومها بكاميره ذكرياتى
وقررت اسجل الذكرى دي هنـا
وحترامي ..للطـائر ده
انـا سعيده اووى ان ربنا اختارني اكون من الناس الي شافوا المشهد ده
اكيـد له في مســار حياتى
اشـاره ودليل
------
---
-
الصوره للمصور البورسعيدي الي دايما عيونه تلقط تفاصيل البلد دي
وليد مُنتصـر
12 comments:
!أول تعليق
رائع
انا ماليش دعوة انا عايز من ده
انتى شوقتينى اوى ألبى وازور (الكنال) الحلوة
انا بجد بعشق السياحة فى اماكن بلادنا الجميلة
وحلو اوى موضوع المعدية دى
يعنى الواحد يودع اهلة قبل ما يجى ياخد الجولة دى ؟ ولا فى أمل نشوفهم تانى هههههه
سعدت جدا بزيارة مدونتك
تحياتى
عجبني اوي البوست يا مي
فيه احساس جميل بالمكان
طيور النورس بيبقي شكلها جميل اوي
الصورة حلوة جدا
كل سنة وانتي طيبة
بقى كدا شا شريره ؟؟
البوست دا تبعتيه على مدونتى
ممكن؟؟
هههههههههههههه
الله يا مى بجد عليكى
اولا انا بقى هكتب الجزء اللى انتى مش كتبتيه كمان
وهو انه فيه ناس بيبقى لها مكان معين فى المعديه
!!
انا يا مى كدا وبحب اوى انى اقف فى نفس المكان وممكن اوى انى اضايق لو شفت حد غريب عن بورسعيد واقف فى المكان دا
بحس اوى بجد بالبحر والنورس وكل حاجه حكيتى عنها
بجد انا بحمد ربنا اوى انى من البلد دى لانى فعلا بعشق كل حاجه فيها
كل حاجه فيها لها معنى وذكرى جميله جوايا
اما النورس بقى يا مى
فبجد الطائر دا عجيب اوى
سبحان الله اذا كان فى شكله او حتى فى تصرفه
يعنى شكله والوانه
يعنى النقطه اللى بتبقى ورا عينه مباشره و لونها زى لون عينه
ورجليه كمان سبحان الله لونها احمر
تركيبه الوانه بجد سبحان الله جميله اوى
اما تصره فانا بحقد عليه فعلا
بجد مش بهزر
حر اوى
حياته ما بين السما والبحر
ذكى اوى
عنيد اوى
بجد الطار دا عدى رمز بحبه اوى
مش عارفه بجد اقولك لا حلو ولا احسنتى لانه الكلام قليل اوى على البوست دا انا بس حبيت انى اقول حاجات حسيتك يمكن مش كتبتيها لانه مش عندك وقت
ربنا يسعدك اوى اوى اوى بقدر ما اسعدتينى لما قريت البوست دا
بحبك اوى
ربنا معاكى ويا رب دايما تكونى بخير
ازيك يا مى
كل ألف سنة وانتى طبة يارب والسنة الجاية تكون أحلى واكثر تحقيقا لأهدافك يارب
مش النورس بس يا مى
كل الطيور كل الكائنات اللى فى النيا لها هدف إلا الغنسان سبحان الله اللى بيضيع هدفه رغم انه الوحيد اللى ربنا اختاره عشان يحمل الأمانة
كلنا يامى لازم يبقى لنا هدف ونحاسب نفسنا كل فترة قربنا منه وللا لأ.. لسة قد ايه عشان نوصله.. الامل دايما موجود واحنا اللى بتلغيه بالجرى ورا الانهزامية والضعف البشرى
احنا أقوى مخلوقات الله بس مش عارفين قيمة نفسنا
ربنا يديك من فضله ومن حكمته ويزيد تأملك للحياة ويخليك تطلعى من كل موقف بخبرى لحياتك
كل سنة وانتى طيبة مرة تانية
انا عايزه اسجل اعجابي بمدونتك اوي
دي مش اول مره طبعا اشوف المدونه
بس المرادي حسيت اني عايزه اسجل اعجابي بيها
ببساطتها اوي
رغم ان كل موضوع مش بيخلو من فكره معينه وفكره عميقه اوي
رغم ان كل موضوع لازم بيخليكي تفكري غصب عنك
لكن انا اللي عجبني فيها مش افكارها
بساطتها
بحيكي عليها
وربنا يوفقك دايما
الله يامي
وصفك فعلا رائع
بجد الناس اللي مش بيشفوهم بيخسروا كتيييييييير
السعي وراء التميز..الاختلاف ..التفوق
هو ده اللي بيفرق فعلا يا مي
زي مقلتلك قبل كدة..عينيكي بتلقط تفاصيل صغيرة قوي قوي
بس فعلا بتفرق
اولا بما اني متاخر
كل سنه وانتي طيبه هنا:)
ايوه كبرتي
عقلا بس متخافيش:)
البوست ده بقي
يـــــــــــاه ... قد ايه مــركز .. قد ايه بيتــحدى ... قد ايه مُصـــر ...قد ايه نظـرته ذكــيه...قد ايـه واضــح ...قد ايه هو غير كل النوارس الي بتستنى الي يقع منه
ده ميل جيبسون يابنتي مش طائر نورس:)
بس تعرفي بجد حلوه الفكره
حلو التامل
حلو التحدي
حلووووووووووووووه بورسعيد
تحياتي يا مي علي الافكار الجامده
وسلامااات يا عجوزه:)
احمد الصباغ :
انا كمـان سعدت بزيارتك
تأنس وتنور بورسعيد يا فندم
بس انت قول يا سفـر
------------
عمرو احمد :
سعيده انه البوست عجبك يا عمرو
وان احساس الصوره وصلك
وانت بالصحه والسلامه يا رب
-------------
ســاعه غرووب :
هههههههههههههه المرحله الجايه في
بوستات كتير حتحتاج تتنقل هناك
:)))
عجبنى اوي وصفلك لتفاصيل النورس ...
المعديه دي حيــاه
والنورس ده حكايات ...
انا فرحانه انه البوست لمسك ...
ودعوااتك يا رودي يا صبحتى :))
------------
اخف دم باشا :
انا الحمد لله تمام ...
وانت طيب يا رب ..
تفتكر هما عرفين هدفهم اكتر مننا لانهم مخيرين ..؟
ربنـا يستجيب الدعاء يا رب ...
و نوصل لمرحله وضوح الهدف بالدرجه الي نتمناها ...
تحياتى بشده ... وكل سنه وانت بالف خير ...
--------------
كورتي البع بع :
مش عـارفه اقولك ايه يا انوش ..
انتى مستشعره البساطه علشان هي جزء منك ...:)
تحياتى
--------------
اسراء الاميره :
الحمد لله اننا من الناس الي شافوا
--------------
الكونت عيسى :
اه يا عيسى ... السعي باصرار بجد
مختلف اووى
:)
تحياتى يا كونت
--------------
حصـان بري :
فينك يا محمد بقالك بوستين
:))
وانت طيب يا محمد ... امممممم كبرت
احداث كمان ... يعنى الاحداث الي بتحصل حواليا
وربنا يستر من الي جاى بقاا
:))
ههههههه
حلوه حكايه ميل جبسون دي
بجد كان نفسي اقدر اخد
print screen
من خيـالى واجيبلكم صوره عنيه هنا تشوفوها ... مش حنساها ابدااا بجد
بورسعيد حلوها اووى حلوه لو حسيتها اوى ... بس انت انوي تيجي
تشـرفنا
يا دكتـور
تحياتى
راااااااااااااااائع
عندك حق فى كل كلمة
احساس رائع يا مى :)
شوفى البلوج لوحدة مشكلة جميل جدا ماشاء الله عليكى وانا بورسعيدية وبموت فى النورس والمعدية وياااسلام عليها فى الشتا والدنيا بتمطر
أول مره احب ركوبه المعديه بعد ما قريت الوصف الرائع ده للرحله دي ..
هايل هايل هايل .. :)
Post a Comment