من قبل العـيد بكتير ... نستعد ... نجيب الي تحت البلاطه
وننـزل نلف ونلف ونشتري هدوم العيد
كـل حاجه جديده هدوم خروج وشرابات ولمؤاخذه جزم ومفيش حاجه تعجبك و متشتريهاش
..و ضروري بجـامه العيد
امال ايه...؟
وتهل ليله العيد ... و الكل بالدوور.. ياخد الشاور التمام ... ويلبس بجــامه العيد ...
ويجي ينام يلاقي نفسه مش عارف ينام
فرحـان ...ومتوتر وبـيرتعش..ومش عارف ليه خايف الصبح يطلع
وافكار في دماغه بتدور ... حقابل صحابي امتى ... يووه مش حنعرف نخرج اول يوم
يا ترى الواد ابن خالتى الصغنن كبر ولا لسه
حنسافر على طول بعد الصلاه ولا ايه النظام
يـا ترى مين اول حد حنفتح له الباب
طب ومين اول حد حيفتح لنا البـاب
يوووه ... حنطلع سلالم كتير اوى بس ميضورش اصلهم بجد وحشوني
....,....,....
وبين زحمه افكاره ورعشته الي مش فاهمها ... يمكن يخطف له نص ساعه او سـاعه قبل الصلاه
يصحى من نومه متـأخر ... ويجري في البيت علشان يلبس ويلحق الصلاه
وتملى يتوضى و ينسى في لهوجه التأخير يصلى الفجر ....
..يروح جـــري على السـاحه
وتملي يحب يتأمل الوشوش
ويتغـاظ من الي بيرغي وسـايب التكبير
وفي وسط التكبير يقوول اخ نسيت اصلي الفجر ...
يقطع تكبيره ويصلي ..ويرجع يكبر تانى
و في وسط التكبير... ابتسامه لصديق و لحبيب ولقريب
و نقوم نصلى العيد و يفرح بـصوت رجلين الناس على الارض وهي نازله للسجود ...
صوت بيفرحه ويرهبه
وبعد الصلاه... تبدأ التهانى ... كـل سنه وانتم طيبين
اصحابه من الكليه على المدرسه على اصحاب تانيين كتير مش قادر يحدد منين ...
ويـروح يلاقي الجزارين منتشرين في البلد و الاضحيات خـايفه
وصوتها مرعـوب
ويغمض عينه لما يلاقي واحده بتندبح
ومعدته تقلب لما يشوف الــدم
ويشم ريحه اللحمه الضاني الي عمره مـا حبها
بس بردو بيبقا فرحان بالعيد ... و احساسه غريب مش قادره يحدده
يـكمل يومه بخروج وزيارات وتلفزيون مفتوح فيه من مسرحيه لفيلم قديم من بتاع الكفـار
وعديه تًمـلى يعدها و يشوف وصلت لكـام وحيعمل بيها ايه
طبعا لعبه العيد شيء اساسي.. ومن بعدها يشوف حيعمل ايه ...
لعب وجري ومرح ... وهدوم جديده .. واحساس مش فاهمه
و شيكولاته بالفول السوداني يشتري منها كتيير
...لانه بيحبها
وتـفكـير
اممممم
وحشتنى اوووى الايام دي بتفاصيلها ...
وحشتنى في عيد ملبــوخ
قبله امتحانات وبعده امتحانات
مفيهوش هدوم عيد ... ولا بجامه جديده
لا عنده وقت يشتري ... ولا عنده موضه عدله
ينقي منها حـاجه (( يلبسها )) ولو لقاها ... ايووه
الحاجه الي ينفع ((يلبسها ))حيلاقي تمنها في جيبه مفـيش
واهو عيد حيعدي والسـلام وحشانى ايامه اووي مع انـي فيه
يلا
كــل سنه وانتم طيبين
وينعاد عليكم زي ما بتحبوه
بتفاصيله الخاصه عندكم
وادعولى في سجودكم ربنـا يعدي امتحاناتى علي خير ... لحسن اتضح اني بدرس هندسه تقيله حبتين ...
11 comments:
كل سنه وانتي طيبة وكده
نسيتي لما كان الراجل اللي بيدبح يرش المياه علشن يغسل الدم
ويتعمد المياه يرشها ويبل بيها رجلينا علشان نمشي
وبعدين يزعق ويقول يعني اعملكم ايه علشان تمشواا
فاكراه ؟
كل سنة اونتي طيبه
ويارب يكون عيد سعيد عليكي
ويارب الامتحانات تيجي كويسه وانتي تحلي فيها كويس جدا ان شاء الله
ربنا معاكي
(:
السلام عليكم ورحمة الله وبركاته
..........................
كل سنة وانتى طيبة وعيد سعيد عليكى وعلى كل المسلمين
وربنا يوفقك ان شاء الله وتبقى بشمهندسة قد الدنيا :D
تحياتى
كل سنة و أنت طيبة
و عيد سعيد عليكى و الواد نوفا و طنط
و تعدى الامتحانات على خير ان شاء الله
و تعيدى بقى فى اجازة نص السنة للاجازة و العيد سوا
و سلام :)
كل سنة وانتي طيبة
عيد سعيد
:) kol sana w ente tayba ya 2amre
eeeeeeeh ya bente kant ayam
كل سنة وانتي طيبة
اجمدي كدة و ان شاء الله ربنا حيعدي كل حاجة وحشة علي خير وحتبقي احسن مانتي متوقعاها
وربنا يعينك يارب
كل سنة وانتي طيبة
فوكي يا قمر
و انتي طيبه
و ان شاء الله ربنا معاكي في امتحاناتك
و على العيد الجاي
تكوني خلصتي من هم الامتحانات
ربنا معاكي
زيزي
كل سنة وإنتي طيبة وعيد سعيد
ربنا يكرمك وكدة برضه
تحياتي
زحل الفلكي : وانت طيب يا محمد
ااه الراجل ده انا عمري ما حبيته كان شرير ...
:))
----------
اسراء الاميره :
وانتى طيبه يا اسراء ..
اميين يا رب ..
تحياتى
------------
يوسف المصري :
وانت طيب
دعواتك يا عم جو
:))
تحياتى
------------
بحري :
وانت طيب يا محمد ...
ياااااا رب تعدي على خير
-------------
عمرو باشا :
وانت طيب يا فندم
-------------
نهر الانهار :
:))
ااه كاانت اياام ...
كل سنه وانتى طيبه بقاا
-------------
الكونت عيسى :
دعوااتك يا عيسى
وكل سنه وانت كمان طيب :))
-------------
meekness:
عااااااا انا لسه حستنى للعيد الجاى
هو انا في طب ولا ايه :))
بحب اوي دلع فوكي ده :)))
تحياتى
------------
الاستاذ:
وانت طيب وكده بردو
:)))
وامين يا رب
تحياتى ..
فكرتيني بزمان وايام زمان .. :)
معتقدش ان الواحد ممكن يعيش ايام بالجمال والبراءه دي تاني .. :)
كل سنه وانتي طيبه .. ويارب السنه الجايه كدا تكوني حققتي الي انتي بتتمنيه .. :):)
Post a Comment