شـكرا لانك انت
شكرا لانك عشت حياتك زي ما عشتها
شكرا لانك عرفت اصحاب بجد اصحاب اوفيا
بيسألوا عليا دايما لانك كنت بتحبهم وهما لـسه بيحبوك اوى
شكرا لانك كنت بتحب النـاس و بتقضى مصالحكم
شكرا لانك كنت ذكى ,عملى ودايما دماغك بتشتغل
شكرا لانك كنت طيب ..
شكرا لانك كنت بتحب السفر والتصوير
شكرا لانك كنت بتحبنا بجد
شكرا لانك كنت بتتحمل اووى
شكرا لانك كنت بتحب مامتك اووى .. وعيلتك اوى ...
شكرا لانك عمرك ما في يوم نسيت مناسبه لحد فينا
شكرا لانك دايما كنت بتسأل وقت لما الي بتسأل عليه يكون محتاجك تسأل وقتها
شكرا لانك كنت بتعمل في صمت ..ده خلاني اعرف كتيير اووى عنك من حكاوى كتير وانت مش بينا
شكـرا لانك علمتنى افكر من غير ما تقولى فكري
شكرا لانك علمتنى اتعلم من غير ما تقولى اتعلمى
شكـرا لانك اخترت امي ... بالذات امى ..علشان تكون امى
شكرا لانك كنت بتحب تحفظ جزء من ذكرياتك ...
فـاكره من صغري ... لما كنت بفتح الدرفه بتاعتك انا اواخويا او حد فينا ... كنت بقضى سعات قدامها من غير شبع ...
افتح ..اقرأ ... واشوف .. اضحك ..افتش ... واعرف شويه ذكريات
اتفرج على الصور ... اقرأ الاوتوجراف ... واقرأ الاشعـار والجوابات
واتفرج على نظامك في كشكول المحاضرات ... واتعقد
و اقلـب تانى وثالت والاقي كراسه الحضانه بتاعتى جزء من ذكرياتك ... عاينها ومحافظ عليها
وكـأنك بتعلمنى ... اشيل لاولادي ذكرى ومعنى و حكايه مني
ودلــوقــتى
انا لسه بعمل كده ... وبعيش معاك و ارسم في خيالى قصص كتـير اوى
واتعلم .. واعرف حجات كتير جديده ...
رغم ان الدرفه دي مش كبيره ... بس هى في حياتى بجد كنز ...بشوف حواليها دلوقتى نـور
وبشم فيها ريـحه زمن... عرفـاها... وبتفكرنى بيك ...
وبفتكر لما كنت جنبها بتعلم انواع المفكات والمسامير و اللمبات
و حجات كتير بسيطه بس لازم
كل واحد يعرفها لانها مهمه في حياته ... فـاكره قد ايه كنت بستمتع بده بجد
يــاااه
فاكره حجات كتير اوى ... المدرسه.. لما كنت تيجى دايما تصورنى في اول ايامها في الطابور
و في حفلات المدرسه ... يوم الامتحان الصبح لما كنت تنزل تشتريلى اى حاجه بحبها ... وتوصلنى و على وشك ابتسامه عرفاها ... انا
ولما اخلص ترجع تاخدنى ... و لما اقولك عملت كويس ... كنت بحس فرحتك ...
و لما اقولك عملت وحش ... تقولى قدر الله وما شـاء فعل انسي و فكـري في الي جاي
و طبطبه ايدك على شعري و انا بذاكر ومعاها ابتسامه عرفاها على وشك ... كانت دايما حافز...وكنت بحس
فيها حنان واصلنى اوى
فـاكره ملامح وشك وقت لما اخدت اول مقلب في حياتى في صديقه ليا
وكنت بحكيلك ...بدموع متأثره
فــاكره ... وفـاكره ... وفــاكره
حجات تانيه كـتير كتـير
حفضل احكي عنها كتير
وححكى عنك لاولادى
.
.
شكرا لانك كنت ومازلت في حياتى اثـر
ورغم الاثر ده انت بردو
بجد وحشتنى ..
اسـتمتعوا بوجودهم في حياتكم اوى
ولو مش موجودين ... احمدوا ربـنا من جوه قلوبكم اوى اوى اوى
سيـبوا اثر و تاريخ طيب ... يفتكركم اولادكم بيه .. خلي اخلاقكم وسيرتكم .. تخليهم يفخروا ان حد فيكم
كان في يوم اب او ام ليه
.
.
.
15 comments:
وشكرا ليكي يا فوكيرة على الحالة الجميلة اللي عيشتيهاني
والحمد لله حمدا طبا كثيرا مباركا فيه
شكرا لمشاعرك الرقيقه
شكرا لاحساسك الجميل
اكيد هما حاجة مهمة لينا جدا
تحياتي
فوكيره
بجد مش لاقيه كلام يعبر عن احساسى اوى بكلماتك بس كل الى اقدر اقوله انها بجد رساله مهمه اوى اوى ويا رب نعرف ننقذ اللى استفدناه منها اوى
مشاعرك طيبه اوى يا مى ونقيه اوى
ربنا يديم النعمه دى عليكى
ربنا يسعدك اوى بقدر ما بتتمنى
شكرا اوى اوى ليكى
فوكيرة
والله مش عارفه ارد اقول ايه على كلامك ده
قد ايه كلامك جميل و مؤثر و حساس
ما تتخيليش قد ايه انتي رجعتيني لورا
فكرتيني بحاجات كتير
زكريات زمان
حتى درفة الدولاب ( اللي هيا بالنسبالي الشنطه اللي بابا شايلها في دولابه )
اللي بفتحها و اشوف فيها حاجات كتير بابا محتفظ بيها
شهاداتي بتاعة زمان و صور قديمة قوي محتفظ بيها
اخر حاجه شفتها
كانت صورة ليه و هوه عنده 12 سنه
ههههههه
شكرا ليكي لانك فكرتيني بكل ده
زيزي
شكرا ليكى يا مى بجد على الكلام التحفة اللى طالع من القلب ده
ولانه من القلب فبيوصل القلب على طوول
واكييد هوا كمان فاكر ده كله وباصصلك وانتى بتكتبى الكلام ده ومبسوط اوى بيكى
مش معنى انه مش موجود معانا دلوقتى يبقى مش شايفك
ده اكيد شايفك وبيطمن عليكى على طول كمان
واكيد فرحان اوى بكلامك دلوقتى وعارف هوا أثر فيكى اد ايه ومبسوط اوى انه رباكى بالشكل ده
انا مش عايز اتكلم كتيير بس بجد اى اب لازم يكون فخور اوى اوى لما يكون له ولد او بنت زيك كده
ربنا يخليكى انتى ومحمد لمامتكم وربنا يخليها ليكم
وتفضلى انتى ومحمد ناجحين ومشرفين اهلكم دايماا
ومشرفينا باننا نكون أصدقاء ليكم
:)
آلام وآمال :
اشكر مرورك ... :)
------------
semsem:
شكـرا للي وصله الاحساس ...
------------
عمرو احمد : اكـيد يا عمرو ...
------------
ساعه غروب :
امييين يا رودى ... دايما تعليقك بيوصلنى وبيفرحنى اوى ...
تحياتى
-------------
زيزي :
انا فرحانه انه البوست ساب عندك اثر...
مممم .. انا اسفه اوى على التاج الي لسه مجاوبتوش ... بس افضى شويه وامخمخ فيه ...:)
تحياتى ...
---------------
زورديك :
تعليقك خلانى اتخيل الوضع زي ما وصفته يا احمد ...
وعارف خوفت كمان من المسئوليه ...
امين يا احمد ...
وربنا يديم صداقه الخير والاخوه دي يا احمد ياا رب ...
فكيرة تعبتينى يا شيخة
شكرا ليكى على كلامك الجميل
وبالتأكيد هوة أب يستاهل
اودي :
ربنا ما يجعلنى اتعب حد :)
هو فعلا يستاهل جداا
اشكر مرورك ...:)
يمكن لعمق الاحساس
و لصدق التعبير
و لان البوست لمسنى اوى
تعجز الكلامات عن التعبير
و لا ان اقول اى شئ كتعليق
ألا رحمه الله فقد كان يحظى بحب المحيطين
و مازال بحظى بسمة طيبة
و يارب تحفظى على الاحساس ده بيه
و سلام
يااااااااه يا فوكيره
عندك حق
ياتري هنسيب اثر لولادنا زي اللي اهلنا سابوهولنا
هنقدر نضحي علشانهم بنفس القدر
هنقدر نربيهم صح؟
الموضوع ماطلعش سهل قوي زي ماتخيلنا:)
بوست جميل يا مي
الحمد لله على كل حال
بارك الله فيك يا مى وأسأل الله أن تكونى سببا فى دخول والديكِ الجنة
مى أنتى
وحشتنى أوى أوى أوى
بحري :
مش حعرف اقول غير امين
-----
حصان بري :
اه يا محمد الموضوع فعلا طلع مش بسيط
كـل لما اعمل عليه اسبوت اكتر اخـاف
وخصوصا من تطور المجتمع والحجات الغريبه الي بقت فيه
نقول ايه الله المُعين
تحياتى ...
-----------
امه الله :
ربنا يباركلك يا بنوته ...
انتى كمان وحشتينى بجد ... ادعيلى بس نخلص امتحانات علشان نشوف بعض بأذن الله
خليتى دموعى تنزل منى
جميل اوى كلامك يامى ياجميل
صحيح اني مقابلتوش قبل كدا ..
لكن انتي بشخصك وبفكرك عنوان لأب عظيم ..
ثقتي انه لو كان موجود كان هيبقى شديد الفخر بالانسانه الي بقيتي عليها ..
ثفتي ايضا انك هتربي ولادك احسن تربيه .. وانهم هيكبروا عشان يكونوا فخر ليكي ومكسب لمصر زي ما انتي كبرتي عشان تكوني فخر لباباكي ومامتك ومكسب لأجمل بلاد الدنيا .. :)
Post a Comment