بنتين قاعدين جنب السواق قدام
كل واحده منزله خصله صفراء من
تحت الايشارب
السواق مشغل شريط للمطرب الاكثر نكدا في العالم
مصطفى كامل
يعلوا صوت احداهن من شده الاندماج مع اغنيه للسابق ذكره
زماان خنتى وبعتينييي ولا همك دموووووع عينى
لتقطع الاخرى اندماجها ..بغتاته
وتقول :
" انا زعلت يوم لما شوفتك ماشيه مع الواد الي كان عايزنى"
لترد الاخرى وهى بتندغ اللبان بطريقه غريبه
" انهو واحد الاولاني ولا التانى"
تنفجر اختكم ضحكا محاوله ان يكون هذا الضحك في الخفاء علشان ما اضربش
--
سائق مسرع ... يدندن مع احدى اغنيات فريد الاطرش
المذاعه على الراديو ... وكـأنه بيقول حكم
اه يا حلو ااااه
ينطلق الاخر بجانبه ويبدأ الحديث
الشباكى -شباكى
انت تشتمنىىىىىى -
انت زعلت -
نهياااااااهاااااااااهااااااااا بقا كده -
(الضحكه اتسع فيها فمه من اقصى اليمين الى اقصى اليسار)
ماشي يا تيييييت
ترتفع حواجبي واتابع التأمل
سائق تاكسي راكن في نص الشارع
يقول السائق يحادث احد المواطنين بجواره
مهو اصل ده من الاول من التربيه هو اتربى مهمل كده مش متحمل المسئوليه -
ااااااه عندك حق -
وعارف ده تلاقيه كده في بيته وعياله ومراته وفي حياته كلها مهمل-
يقطع كلامه ويقول للماره
يلاااااا اوكازيوون الاتنين بربع جنييه-
وتتكرر الضحكه السابقه بنفس تفاصيلها
(مصمصه شفايف ثم يتابع الدندنه)
لاقول في عقلي ... وحضرتك بالنوسبه للشتيمه دي بردو من الاول ومع مراته وعياله ولا دي خارج التصنيف
!
--
صووووووووووووت سي عبده الحليم حافظ ..مختلط مع صوت السائق
جبااااااااااااااااااااااار ... جبااااااااااااااااااااااااار
واحده طنط منتقبه واقفه في الشارع ..وقفته وهى بتركب
قالت : الداير
رد لا الامييين .. بضحكه خبيثه ثم .. يلاااا امشي
!
يتابع السائق الغناء ثم يقول لـ 2 من المواطنين الي بيعدوا الشارع
يلااا يا بندق ...يلا يا بندق عدي يا بندق وكأنه يدلل طفل صغير -
يقف في المحطه ويعلوا صوته موجها كلماته الينا
يلااااااااا يا كتاااااااااكيت انزلوا -
ليرد عليه ثلاث شبان من الركاب
سيوووو سيووو سيوووو -
واانا اتـأمل المشهد وانفجر بالضحك انا وباقي الركاب
كم كنت سعيده لايجاد من شاركونى الضحك والاندهاش يومها
انزل من الميكروباص ... لاقول في عقلي
احلى حاجه فيك انك بتسلي نفسك وانت بتشتغل واخر روقان
اهو ده حب ما تعمل على حق
--
احد المواطنـين
على جنب يا بااااااشمهندس -
في عقلي بس متقولش باشمهندس طيب -
!
--
الميكروبــاص
..حياه كامله قابلت فيها انواع مختلفه من البشر واحيانا الكائنات
اكتشفت اني قبل حياتى مع الميكروباص
لم اكن من طبقه عـــامه الشعب المصري الكادح
في الميكروباص ناس ...حكايات .. عيون ...وشووش.. افكار .. ثقافات مختلفه ... كبار ... صغار ...متعلمين ... وغير متعلمين ...طيبين ... وخبثاء.. تشاركهم في خلال رحلتك القصيره معهم الحـــــياه
وعجبي
25 comments:
والله يا جوسي الميكروباص ده كوكب تاني متحرك على كوكب الأرض
بيجمع مختلف البشر
الواحد يقعد في الميكروباص
زي ما يكون قاعد في المسرح ..
كل راكب جديد بمسرحية .. ولما يسدل الستار عنها
ينزل من الميكروباص ويطلع اللي بعده
وهكذا ..
واحنا الجمهور المتفرجين ...
بنتفرج وبس لكن مستحيل تشاركيي بالاحداث
يا السائق ينزلك
يا هنضرب
ازيك فوكيرة
فينك يابنتى مش باينة
شوفى لو فضلتى تراقبى الحاجات دى مش هتخلصى
وتستمر الحياة
تحياتى
بالرغم من ان الميكروباص ممل و بطئ
و بياخد وقت طويل
ألا انك برضه فيه لو فاضيه هتشوفى من الكائنات الفضائية الكتيررر و الكتييير
اولا : حوار البنتين و الشابين سوا
حتى السواقين ده كله واقع مجتمع
قلة فيه الاحترام و الخجل و الوقار
بس صحيح اكيد سواق الميكروباص ده قرأ البوست
بتاعك اللى بيتكلم حاسة انى فرخة
مادام قالكوا : يلااااااااا يا كتاااااااااكيت انزلوا
ههههه :p
بس مفيدة الرحلات دى بتديلك مناعة من التعامل مع الكائنات دى
بس دول رحمة اما سواقين طرق السفر
يالهوووووووووووووووووى
بس بوست جميل اوى
بس دول مش طبقة الشعب الكادحة
دول طبقة الرعاع اللى مش مرتبطة بحالة و مستوى الشخص ممكن يكون مليونير بس من الرعاع
و ممكن شخص فقير جدا من الاشراف معاملاتيا
و سلام :)
كتير بستغرب من الميكروباصات واللي بيحصل فيها
احكيلك كنت مره راكب الداير
عند المتحف الحربي كده لقيت 2 عيال شكلهم متشردين واحد قال للتاني ياللا يا لا قاله يلا
ولقيتهم ركبوا جنبي
مش عارف ليه جالي هاجس ان العيال دي حتعمل حاجه علشان متدفعش علشان منظرهم اساسا كان تشرد وعيال لبط
المهم فضل الميكروباص ماشي وكل شوية يحاولوا يبصولي
نفضتلهم خالص
قالك يا جدع ده مفيش منه فايده
دخل على اللي جنبه من الناحية التانيه
ويبص للراجل اوي
والراجل مستغرب
يبصله اوي
والراجل مستغرب
لحد مالراجل اتخنق
قال للعيل :فيه حاجه
الواد قاله مالك يا جدع
(بفتح الدال )
هو حد عملك حاجه
سكت الراجل
راح الواد رجع يعمل نفس العمله تاني
هوب قامت خناقة في الميكروباص الواد ظبطها صح
نزل من الميكروباص وماسك ايد الراجل ويقوله تعالي بس حوريك بره الميكروباص
ونزل العيل من الميكروباص هو وصاحبه
وبيدور على طوبة وراح حادفها على اللي راكب جوه
ومشي من غير ميدفع ولا مليم
نصب مش كده
حتى من العيال
(الحدقة)
صحيح
مرة كنت راكب ميكروباص
و حصلت خناقة بالشوم جواه
لسه مفتكر حالا لما شوفت كلام نوفا
اتنين صعايدة اتخنقوا مع بعض واحد جرى ركب الميكروباص و التانى حصله لحد لما لحق الميكروباص فى اشارة
و دخل الميكروباص
و هاتك يا ضرب فى التانى
ههههههه
كنت وقتها فى اعدادى
هو فيه ايه ؟
بس كنت مبسوط لانى بحب الاكشن
ههههههه
الميكروباص == الالام
وبما ان الحياة سلسلة من الالام المتتالية
اذن الحياة سلسلة من الميكروباصات المتتالية
وفعلا الميكروباصات و القطارات وسائل اندهاش و تأمل اكتر منها وسائل مواصلات
إنتي كااااااااااااااارثة ... مش ممكن طريقة سردك .. البنت أم لبااانة دي شكلها لزق في دماغي من وصفك .. و متهيألي لو شوفتها في الشارع هاعرفها .. بجد حياااة الميكروباص ..
أستاذة يا بمشهندسة
أنا بحب أركب الباص بس علشان اتأمل الناس وأواكب أخر التطورات بحس إن التاكسي بيفصلك عن أحداث كتيييير أوي
محبتي
طيب سيبك من خالد الخميسي ونزلبي
ميكروباص علي غرار تاكسي
بجد روعه جدا
الميكروباص دا حكايه
بالنسبالي دا حياتي لاني بقضي معظم اليوم فيه
ومقدرش استغني عنه
لانه هوا اللي بيجمعني باصحابي
كنت خايفه بعد مادخلت الجامعه اتفرق انا واصحابي بس الحمد لله الميكروباص جمعنا وبما ان مشواري للجامعه ساعه ونص في الميكروباص فبشبع من صحابي ونحكي وحاجات كتير ونعرف اخبار بعض
وعن طريق الميكروباص اتعرفت بناس كتير
وكونت صداقات كتير ببنات معرفتي بيهم هيا الميكروباص
الميكروباص دا بقا حته مني خصوصا انه نفس المكروباص بتاع كل يوم
حلوة واللهى
لاء بجد
كنتى مركزة أوى
سعات كتير بتحصل لنا
وأحنا ماشيين أو راكبين
بنفكر فى الناس وكلامهم وأفعالهم
ونشوف العجب
بس بنرجع فى آخر اليوم نقووول
عادى بقة أهو كلام وأفعال وخلاص
أودى
عارفه بجد حسيت انى راكبه جنبك
وحسيت انى عارفه كل تفصيله بتحكيها
وانا الى حاسبت كمان
ههههههههههههههه
بجد بوست رائع جدا
ايه دا يا بنتى
نقل واقعى لما يحدث
عارفه كان لازم تكتبى فى الاخر
كان معكم مى على الهواء مباشره
بجد ارئع
ووصفك دقيق جدا
جدا
بجد شكرا ليكى
لو افتكرت موقف من المواقف المشابهه هاجى اقلك على طول
دا بعد اذنك يعنى
:)
اسجل حضور فى المدونة بتاعتك يا مي اللى عجبتنى جدااا
وبالذات الموضوع ده لفت نظرى قوى
هكمل قراءة واجى ارد :)
هههههههههههههههههههه
هو انتي لسة شفتي حاجة
يا بنتي والمترو برضه عالم تاني
كل مواصلة من مواصلتك يا مصر عالم تاني تتعلمي منه العجب
ويا سلام بقي يبقي جون وجون وجون لو كنتي البطلة في وم
او مشاركة حتي بدور كومبارس
تبقي قمة التعليم ساعتها
يااااااااااه الواحد يا ما يعيش ياما يشوف
وانت لسه شوفتى حاجه
الميكروباصات والتاكسى واالاتوبيسات والمترو وكل مواصله فى البلد دى ركبتها لازم اشوف حاجه جديده من البشريه اللى عايشه حواليا
حسام مراد
شغال
يلا سلاماااااااااااااااااات
لنا كنت فاكر نفسي اكتر واحد اتهرس في الميكروباصات لغاية ما شوفت ميكروباصات الاستثمار
حاجة ايه يا صلاة النبي
العربة الطائشة
و بعدين مصطفى كامل ايه اللي مضايقك
ما انت لو سمعتى البتاع اللي بيقول دقيقة حداد كان زمانك قولتى ان مصطفى كامل ده من الاوبرا
داير يا اسطىىىىىىىىى
و الله الانسان ده لذيذ اوي عامل زي البني ادم بالظبط يعني الواحد بيشوف حاجات كتير اوي في الدنيا ديه لكن انتي اول واحدة تقول ان الحياة ميكروباص..كل حاجة في الدنيا ديه هنتعلم منها حاجة حتى الموصلات..احييكي على اللمحات النادرة ديه..سلام
المكيروباص ده تحسى انه دنيا كامله
فيها جميع انواع البشر
تحسى كانك بتفرجى على فيلم سينمائى بيضم انواع كتيره منها اللى تعرفيه ومنها اللى غريب عليكى
دنيا لوحدها
ولو شاركتى الدنيا دى بجد هتشوفى وتاخدى خبره وتتعلمى كتير اوى
بوست عجبنى جدا
تحياتى
يا بنتى كله كوم و ميكروباسات بورسعيد كوم تاني
صباح المعاكسات من السواقين للبنات في الشارع
- تشكسسسسسسسسس خووووود تعالى انا اقولك يا جميل
يعنى حتى مش عارف يعاكس
!!
فعلا ممكن الواحديشوف العجب في الميكروباصات ويشوف شخصيات مختلفه
بس ان جيتي للحق مش كل الشخصيات
على فكره انا حسيت وانا بقرا البوست بتاعك انى جوه الاحداث
فعلا برافو
شوفى يا ستى بمناسبة الميكروباصات والذى منه
واحد كمسارى أبوه توفى .. مشى فى الجنازة يقول :: يا جماعة الجنازة فاضية ورا ..
هههههههههه
فكرتينى بنتاج عمر مديد من الكفاح مع الميكروباصات
والجرى وراها
اكتشفت ان الميكروباصات عبارة عن عالم كامل فعلا
يمكن انا مبحبوش
لكنه موجود
طايفة سواقين الميكروباص والتباعين بتوعهم من اكتر الناس استهتارا بكل حاجة
ومن اكتر الناس اللى مبيحترموش حد
البنى ادم بالنسبة لهم عبارة عن ربع جنيه ماشى على قدمين
والميكروباص بالنسبة لهم هوا مملكتهم اللى يقدرو يحكمو فيها
ويتحكمو
ويمارسو الظلم اللى بيتحط عليهم من الحكومة
على الناس الغلابة
زى ما يكون واحد قوى بيضرب واحد على قفاه
يقوم التانى يرد بانه يضرب حد اضعف منه على قفاه
وتتوالى السلسلة
حلقة كبيرة من الضرب على القفا
وفى الاخر المواطن الغلبان هوا اللى بيتضرب من طوب الارض
عارفة
انا شفت سواقين جايبين بانجو وبيشربوه فى العربية كده عينى عينك
وبيركبو جنبهم فى بعض الاحيان بنات من اللى .....اكيد انتى عارفة
انعكاس كبير لكل الانهيار الموجود فى المجتمع
اللى عجبنى انك خدتى الموضوع بسخرية
مش زى منا واخده قفش دلوقتى
بس اعمل ايه يا بنتى
من اللى الواحد بيشوفه
ونتيجة تفكير كتيير اوى فى امتى البلد هينصلح حالها
يوم متلاقى سواق الميكروباص محترم وبيحترم الناس
وتلاقيه ماشى بالراحة ومبيشتمش اللى راكبين وسواقن العربيات التانية
يمكن ساعتها تحسى ان مصر ممكن يرجعلها الامل تانى انها تنضف
ولا اييه
وكل يوم من ده
ماقولكيش بقى هنا الواحد بيقابل ناس عجيبه وكلامهم اعجب مايكون
ماعلينا
انت معزومه سعادتك على حفلتى البلوجريه جدا بكره الخميس الساعه 5 مساءا والسهره صباحى
وهاتيجى من غير حجج كتير
اوكى
هههههههههههههههه
و النبى ما تفكرينى ... فيه ميكروباظات الواحد بيركبها بيحس انه راكب مراجيح !!! لأ و ايه قاعد مع شوية مهرجين
بس اسمحيلى أشبه الحياة بحاجة تانية
أنا عايزة أشبه الحياة بالاتوبيس !!!!! لانه الحياة الناس فيها كتيييييييييير و بتزاحم بعضها زى بالظبظ الاتوبيظ اللى بيبقى الواحد فيه حاسس و كانه ف علبة سردين
أتمنى تزورى مدونتى و هستنى تعليقك
يارب تعجبك
تحياتى
سواقين المكروباصات لو قريوا البوست دي هيغلوا الاجره ..
وعلى الرغم من كدا الي هيقرا البوست دي من الجمهور مش هيمانع يدفع زياده مقابل انه يشوف الحياه الي بتتولد وتنتهي بمجرد نزلهم من المكروباص بنفس الروعه والبساطه الي صاغتها كلماتك ..
بوست رائع كالعاده .. :)
Post a Comment