سنتين

ليل
غُنا
خوف ممزوج بحماس
ضحكه من القلب
رعشه برد و خوف مهزوم بالزق يا دوب
ترقب ..
عيله واحده كبيره بتعيد اكتشاف نفسها من جديد
هـما مين دول ..؟ دول كانوا معايا في نفس المكان ..؟
دي وشوش ياما شوفتها و  مشوفتهاش
عمرك بصيت في عين اخوك ..؟ عمرك قولت انا فداه ..؟
عمرك قسمت لقمه معاه ؟ .. و أديك هنا بتعيش ساعات بتساوى عمرك واكتر حبتين .
.
.
و في كـل مكان بعيد ..

 ناس في بيوت .. بتدعي
قلبها هناك .. روحها شايفه رغم كدب الشاشات 
قالت لو يصبح عليهم صبح .. راح نعيد مجد  فات .. ونزيد عليه

كانت بدايه قصه أمل .., أمل وحِده .. أمل مارد تـوّه عارف إنه لساه مارد
أمـل قوله يارب بقلب معلق في السما ..
النــصر يومها ..وانت بتتحسس خطاك للحريه
كان انتصار على خـوف اتهزم ومات خلاص مع اسم أول شهيد .. الى الابد
الى الابد ..


فــــمكمليـن

غوايه الاشرار

  وهتفضل الاحلام  تغوينى
كــما الطفله
مـهو قدري :)

مفرمه الابداع الحكوميه

فــرد في قطــيع ..
النهارده و بعد مشاده كل مره بيُعلن فيها عن شغل حكومى .. انا مش عاوزه اروح وماما عوزانى اروح
و اللى دايما بيكون الانتصار فيها لـ ماما
و بنزل علشان متزعلش
المهم و زي المره اللي فاتت .. بحس و كأني فرد في قطيع كبييير , شيء مُهين انك تقف في طابور ساعتين او اكتر .. شيء مُهين ان الطابور يكون بنات في جنب و شباب في جنب في مساحه اقل من 1.2 م
و اللى بيخلص بينزل من نفس المساحه و كل 5 دقايق لامؤاخذه لامؤاخذه
ربنا يكون في عون اصحاب الاوزان الثقيله
شيء مُهين اكتر ان التصارع ده يكون على دخول منظومه ( هى التفسير العملى الفعلي لكلمه فشل ) ..
شيء منيل بنيله ان تيجى الساعه 2 و بعد ما تكون مثلا واقف بقالك ساعه ونصف و الموظف يقولك خلاص شطبنا .. و يتعصب و هو مُنهدش !!
على اساس انه مكانش متوقع .. ؟؟
هو صعب شويه منطق و تقفل الباب من تحت من قبلها بساعه او ترقم الناس قبلها بساعه و اللى مش معاه رقم خلاص ..؟
شيء عبقري ان التقديم يكون ع النت اصلا ؟ !!
مشيت حوالى ساعه علشان افرغ شحنه العصبيه اللى كانت جوايا .. و هحكيلكم على صناعه الثوره اللى عملناها في الطابور :) :) :)
مواطن مصري " فهـلوى " و اصحابه واقفين في طابور لتقديم على وظيفه حكوميه ضحك وهزار ( جميل ده شيء مطلوب علشان يستحملوا ) فجأه هوب هوب راحوا 3 منهم سابقين اللى قداامهم لأ احنا لازم نطلع نسأل الناس اللى فوق هيعملوا إيه و شويه استعباط و راحوا واقفين في النصف .. واحد من الطابور قال لو سمحتوا كده مينفعش انزلوا واحد يطلع يسأل و انتم ارجعوا.. تنحوا شويه و مصمدوش .. راحوا نازلين و اتبقا واحد
عامل هندى .. و الطابور سكت عنه خلاص و هما شافينه
انا مستحملتش اشوف المنظر ده و كان دمى بيغلى " بكره الناس اللى بتستبيح تاخد حق غيرها على إنه فهلوه خاصه انه حتى محسش على دمه " .. دار حوار بينى و بينى
مش هينفع تسكتى مش كفايه انك وافقتى تكونى وسط القطيع كده !
مهو لو اتكلمتى يمكن يرد عليكى رد مش كويس .. و بعدين اصلا هو في طابور الولاد مش هياخد مكانك
مكناش عملنا ثوره بقااا لو هسكت دلوقتى .. و هو الهتاف في الشوارع كان أونطه يعنى
أول ما تمشي ضميرك مش هينيمك علشان سكتى . رتبي كلامك و شوفي رد مهذب على كل مقاوحه منه
يا بنتى بلاااش .. لأ مش هينفع اما اكون جنبه بس
طبعا الحوار ده كان بيدور في دماغى و انا عماله ابرطم مع البنات انه كده غلط و الناس المفروض متسكتش قولت يمكن حد من الشباب يحس على دمه و يزعق له .. مفيش
أكيد حد هيقوله مش معقول كده بردو مفيش .. وكل ما يبصلى انا عارفه نظرتى اما اكون متضايقه من حد بجد نظرتى بتحرق فعلا .. مفيش ..
و قد كان بقاا جه دوري جنبه .. قولتله لو سمحت حضرتك المفروض ترجع لدورك مينفعش كده  , كده غلط ..
راح باصصلى وقايلى ده دوري .. قولتله لأ حضرتك كنت جاى في نفس الوقت اللى انا جيت فيه
راح الراجل اللى هو عاوز ياخد مكانه قاله مينفعش كده .. البجح يقوله انت اللى جاى بعدى و انا شايفك ( انا هو في كده .. طيييب ) و بالطريقه الشهيره بتاعت الثوره و اللى كانت بتجيب نتيجه مضمونه 100 % .. خطاب لباقي الطابور .. انا بنت و هو مش اخد دوري اصلا و كلمته
كده غلط و انتوا مينفعش تسكتوا خالص بجد مش هينفع كده ده مش حقه
الطاابور كله فضل يقوله ميصحش يا كابتن كده و هو بيباجح و انا بزود
هع هع هع نظره انتصار
هو بجح جدا و الناس اتعصبت جدا .. و قل ادبه فجابه لنفسه و هو بيقل ادفه فضل يقل ادب على الولد اللى هو كان عاوز ياخد مكانه و الولد كان ملتحى فضل يقوله احلق دقنك يا شيخ ياللى عاملش شيخ
الناس فضلت تهدى الولد الملتحى ده و عجبنى انه بصله بنظره و اعرض عن الجاهلين
و الناس نزلته فعلا لحد مكانه D:
راجل كبير هو اللى شده و نزله ..

الشاهد هنا : مينفعش بجد نسكت على غلط تانى حتى لو ممكن نتأذى
المجد للبنات و هما عاملين مساكين :D :D

صخب الوحده

مُدمــر

البحث عن الذات

حاول ان تدرك في لحظه ما ان تلك الـ

" أنا "

هي وهــم

اُدرك حقيقتك و مدى عُمقها

و اعلم انك لست دورك .. الذي تلعبه في الحياه انت اعمق من ذلك

..

مشوارى بدأ مع د عدنان ابراهيم
:)
اسمع بقلبك و روحك .. فلهم قدره على الادراك اعمق بكثير
من المنطق و فصي الدماغ

http://www.4shared.com/mp3/fZTM6Ls0/_online.html

خطوه ع الطريق

من نِعـم ربنا عليا الكبيره اوى في الدُنيا دى .
ان من و انا 16 سـنه ربنا بيحط في طريقي دايما ناس انا مؤمنه انهم هيكونوا قيادات وطن ..
و الاجمل ان عددهم في حياتى يوم عن يوم بيزيد :)
معرفه الناس دى ..
بتعلمك : 1- اليقين
2- ان تثق في احلامك
و بتخليك تكون من الناس اللى شهدت ميلاد احلام و تحقيق احلام
و مشاركتهم التجارب الانسانيه في حد ذاته شيء بيملاك طاقه وأمل و قُدره ..
شكرااا يااارب .. الرساله وصلتنى " الجايزه تستاهل " .. :) :) :) :)
.
.
.
جايزه " صــانع الحيـاه "
جايزه من يسير على خطى الحبيب في
" إنما بعثت لـ أتمم مكارم الاخلاق "
هـــي
الجـــنه بسهوله و يُسر
اصلحي نفسك
خذى نيه خير في ان تساعدى من حولك على الاصلاح